Хакерууд хуурамч ажлын ярилцлага болон зар сурталчилгаанд нуусан хортой программ ашиглан Binance криптовалютын биржийн хоёр программ хангамжийн инженерийн компьютерт нэвтэрчээ. Улмаар гурав дахь инженерийн компьютерийг ашиглан 6.3 тэрбум ам.долларын криптовалют хулгайлсан талаар тус бирж мягмар гарагт мэдээлэв.
Энэ нь түүхэн дэх хамгийн том санхүүгийн хулгайн нэг байж болзошгүй байна. Binance халдлага хэрхэн зохион байгуулагдсан тухай анхны тайлангаа нийтэлжээ. Халдлагын бэлтгэл ажил зургадугаар сард эхэлж, хэд хэдэн шат дамжсан кибер халдлагын дараа өнгөрсөн пүрэв гарагт криптовалют хулгайлагдсан аж.
Binance пүрэв гарагийн орой халдлагыг илрүүлж, системээ хамгаалах, мөнгө татан авалтыг зогсоох арга хэмжээ авсан ч хакерууд анхны хулгайн үйлдлээс хойш бараг дөрвөн цагийн турш биржээс криптовалют гаргасаар байжээ.
АНУ-ын Холбооны мөрдөх товчоо уг халдлагын ард Умард Солонгостой холбоотой хакерын бүлэглэл байсан гэж үзсэн бол Пёньян үүнийг няцаасан. Binance хулгайд алдсан хэрэглэгчдийн бүх хөрөнгийг нөхөн төлнө гэж мэдэгджээ.
Энэхүү халдлага нь дэлхийн хамгийн том криптовалютын биржийн аюулгүй байдлыг хэрхэн эвдэлж, сүүлийн жилүүдэд цар хүрээ, давтамжаа нэмэгдүүлж буй Умард Солонгостой холбоотой кибер халдлагад дижитал хөрөнгө хэр эмзэг байгаа талаарх асуудлыг ахин хөндлөө.
Ажилтнуудын компьютер хакеруудын гарт оржээ
Binance-ийн мэдээлснээр, халдлага зургадугаар сард тус компанийн криптовалютын хэтэвч хөгжүүлэлтийн багийн нэг ажилтан интернэтээс хортой кодоор өөрчилсөн программ татаж авснаар эхэлжээ.
Бирж уг халдлагыг дараа нь илрүүлж, ажилтны төхөөрөмжийг сольж, нэвтрэх мэдээллийг шинэчилсэн ч тухайн ажилтан болон хэтэвч хөгжүүлэлтийн багийн бусад гишүүдийн ажлын мэдээлэл хакеруудын гарт орсон байна.
Халдлагын талаар мэдээлэлтэй эх сурвалжийн хэлснээр, программын хортой хувилбарыг зар сурталчилгаанд байршуулсан тул хайлтын системд жинхэнэ хувилбараасаа дээгүүр гарч ирдэг байжээ.
Үүний дараа есдүгээр сард шинэ ажил хайж байсан хоёр дахь программ хангамжийн инженер хуурамч ажлын ярилцлагад оролцсон байна. Тэрбээр хуурамч компанийн гүйцэтгэх захиралтай цахимаар уулзсаны дараа тухайн байгууллагыг жинхэнэ гэж итгэн “хортой код агуулсан программын сан” татаж авсан гэж Binance-ийн тайланд дурджээ.
Аравдугаар сарын 20-нд халдагчид тухайн инженерийн компьютерт нэвтэрч, компанийн дотоод хиймэл оюуны хэрэгслийг ашиглан хэтэвч хөгжүүлэгчийн систем болон өөр нэг инженерийн компьютерт хяналт тогтоосон байна.
Есөн хоногийн дараа хакерууд хоёр дахь инженерийн компьютерийг ашиглан, эхний инженерээс хулгайлсан нэвтрэх мэдээллийн тусламжтайгаар хортой скрипт ажиллуулж, үндсэн халдлагаа эхлүүлжээ.
Халдлагын талаар мэдээлэлтэй эх сурвалжийн хэлснээр, Binance-д криптовалют хадгалдаг болон арилжаалдаг хэтэвчид шууд нэвтрэх эрхтэй инженерүүдийн тоо хязгаарлагдмал байдаг аж.
