ОХУ-ын зэвсэгт хүчин өнгөрсөн шөнө Украины хэд хэдэн томоохон хотын чиглэлд баллистик пуужин болон дроноор цохилт өгсний улмаас наад зах нь 8 хүн амь үрэгдэж, олон арван иргэн шархаджээ.
Украины Онцгой байдлын албаны мэдээлснээр халдлагад нийслэл Киев, мөн Днепр, Харьков, Запорожье зэрэг хэд хэдэн томоохон бүс нутаг өртсөн байна. Эдгээр хотуудад орон сууцны хэд хэдэн барилга болон эрчим хүчний байгууламжууд цохилтод өртөж, зарим бүс нутагт цахилгааны хангамж тасалдлаа.
Украины Агаарын цэргийн хүчний мэдээлснээр Оросын талаас харвасан баллистик пуужин болон камикадзе дронуудын дийлэнхийг агаарын довтолгооноос хамгаалах систем амдан устгаж чадсан байна. Гэвч зарим далавчит болон баллистик пуужингууд хамгаалалтын бүсийг сэтлэн байндаа тусжээ.
Украины Ерөнхийлөгчийн Тамгын газраас уг халдлагыг дэд бүтэц болон энгийн иргэдийн эсрэг чиглэсэн ажиллагаа хэмээн буруутгалаа. Түүнчлэн Олон улсын хамтын нөхөрлөл болон НАТО-гийн холбоотнуудаас агаарын довтолгооноос хамгаалах нэмэлт зэвсэглэлийг яаралтай нийлүүлэхийг хүссэн юм.
