Чуулганы нэгдсэн хуралдаанаар Ерөнхийлөгчийн өргөн мэдүүлсэн УИХ-ын тухай хуульд нэмэлт, өөрчлөлт оруулах тухай хуулийн төслийг хэлэлцлээ. Уг хуулийн төсөл нь УИХ-ын гишүүнийг эгүүлэн татах агуулгатай юм. Хуулийн төслийг хэлэлцэх нь зөв эсэх санал хураалтыг маргааш 10:00 цагаас явуулахаар болоо. Өнөөдрийн хэлэлцүүлгийн үеэр УИХ-ын гишүүн Г.Очирбат дараах байр суурийг илэрхийлэв.  

УИХ-ын гишүүн Г.Очирбат: -Би хуульч гишүүн биш. Энэ хуулийг Төрийн байгуулалтын байнгын хороон дээр орж ирснээс хойш олон талт мэтгэлцээнүүдийг харлаа. Манай хуульч гишүүд үзэл санаагаа нээлттэй илэрхийлж мэтгэлцэж байна. Бас явцуу хэн нэгэн хүн рүү дайрсан байдал ч ажиглагдаж байна. Бас М.Нарантуяа Нара, Ц.Мөнхтуяа, Х.Булгантуяа гээд эмэгтэйчүүд рүү чиглэж боловсруулсан хуулийн төсөл гэж харж байгаа. Ингэж хэн нэгэнд зориулан хууль баталж болохгүй. Бид зүгээр байж байгаад ангийнхаа охидыг "зодуулж" чадахгүй. ҮАБЗ-ийн нарийн бичгийн дарга та хичээлд чинь суугаагүй алдсан хүнийг энд цоллоод байж болохгүй.

УИХ-ын дарга аа, та бол парламентын засаглалаа хамгаалах үүрэгтэй хүн. Тиймээс та байр сууриа тодорхой илэрхийлэх хэрэгтэй байна.

УИХ-ын дарга С.Бямбацогт: -Ангийн дарга шиг байх гэж хичээнэ. Анги хамт олноо тэргүүний анги болгоход зүтгэнэ. УИХ-ын даргаар томилогдоод анхны шийдэж байгаа асуудал бол парламентын таван намтайгаа зөвшилцөөд УИХ-ын тухай хууль, УИХ-ын чуулганы дэгийн тухай хууль, УИХ-ын Хяналт шалгалтын хуулиудад нэмэлт өөрчлөлт оруулах ажлыг эрчимтэй эхлүүлсэн.