ЗГХЭГ-ын дарга С.Бямбацогт Татварын ерөнхий хуульд нэмэлт, өөрчлөлт оруулах тухай хуулийн төсөл болон уг хуулийн төсөлтэй холбогдуулан боловсруулсан бусад хуулийн төслүүдийг өчигдөр өргөн мэдүүлсэн.
Засгийн газар татварын багц хуулийн төслөө УИХ-аар нэн яаралтай хэлэлцүүлэхээр өргөн барьжээ. УИХ-ын намрын чуулган өнөөдөр завсарлах хэдий ч нэн яаралтай горимоор хэлэлцэх эсэхийг нь шийдүүлж чуулганы завсарлагааны хугацаанд хэлэлцүүлэг өрнүүлэхээр тооцсон байна. Харин УИХ нэн яаралтай хэлэлцүүлэхийг нь дэмжсэнгүй. Тиймээс одоо Төсвийн байнгын хороо хуралдаж ердийн горимоор хэлэлцэх эсэхийг нь шийдвэрлэхээр болоо.
УИХ-ын чуулганы хуралдаанаар татварын багц хуулийн төслийг нэн яаралтай горимоор хэлэлцэх эсэхийг шийдэх үеэр ЗГХЭГ-ын дарга С.Бямбацогт "Татварын багц хууль батлагдсанаар иргэн, аж ахуйн нэгж дэх татварын дарамт 2.7 их наядаар буурна. Иргэд НӨАТ, хувь хүний орлогын албан татварын хөнгөлөлт эдэлж, татварын ачаалал хоёр их наядаар буурна. Аж ахуйн нэгжүүд НӨАТ, аж ахуйн нэгжийн орлогын албан татварын хөнгөлөлт эдэлж, татварын ачаалал 700 тэрбумаар буурна.
Жижиг, дунд аж ахуйн нэгжүүдийн татвар дунджаар таван хувь болно. Харин уул уурхайн компаниуд ямар нэгэн хөнгөлөлт эдлэхгүй" гэлээ.
