Аж үйлдвэр, эрдэс баялгийн сайд Г.Дамдинням мэдээлэл хийлээ.
Тэрээр "Өнөөдрийн Засгийн газрын хуралдаанаар Ерөнхий сайдын захирамжаар байгуулагдсан Ган үйлдвэрлэх цогцолбор байгуулах ажлын хэсгийн үйл явцыг танилцуулж, дараагийн шатны сонгон шалгаруулалт руу шилжих эрх олголоо. Аравдугаар сар гэхэд сонгон шалгаруулалтыг эцэслэж гэрээ хэлцэл хийнэ. Гангийн үйлдвэрийн сонгон шалгаруулалтад БНХАУ-ын таван аж ахйн нэгж оролцсон. Одоо улсын нэг, хувийн нэг аж ахуйн нэгж шалгарч үлдээд байна. Гангийн үйлдвэр нь манай дотоодын хэрэглээ нэг сая тонныг хангах ёстой. Мөн экспортын буюу өндөр чанарын ган үйлдвэрлэх шаардлага тавьж байгаа. Дотоодын аж ахуйн нэгжүүдийг ажлаар хангах, монголчуудыг сургах, технологи, мэдлэг дамжуулан ажил хэрэг явагдана. Гангийн үйлдвэрийг Дархан-Уул аймагт байгуулахаар газрыг нь улсын тусгай хэрэгцээнд авчихсан байгаа. Гангийн үйлдвэрийг дагаад бусад үйлдвэрүүд бий болдог. Үйлдвэрээс гарч байгаа шаар нь цемент болдог. БНХАУ-аас орж ирж байгаа цемент яагаад хямдхан байдаг вэ гэхээр үйлдвэрээс гарч байгаа хаягдлаараа хийдэг учраас хамдхан байдаг юм.
Шатахууны түгээх станцуудад хийсэн шалгалтаар ямар нэгэн чанарын алдаа дутагдал илрээгүй. Орон нутагт шатахууны нийлүүлэлтийг сайн хийж байгаа. Сүүлийн дөрөв хоногт эрс нэмэгдсэн. Ойрын өдрүүдэд хүрдрэл арилна. Ер нь доголдол үүссэн үед сарын дараа хэвийн байдалдаа ордог. Орон нутагт саванд шатахуун өгөхгүй байгаа асуудлыг шийдвэрлэнэ. Саванд шатахуун өгөхгүй бол малчид, тариаланчдад хүндрэлтэй" гэв.
