Монгол Улсын Засгийн газрын “Чөлөөлье” санаачилгын хүрээнд “Эрдэнэс Тавантолгой” ХК-ийн иргэдэд эзэмшүүлсэн хувьцаа, түүнд хуваарилагдсан ногдол ашгийг 2026 оны зургаадугаар сарын 1-ний өдрөөс хууль ёсны өвлөгчид шилжүүлэх шийдвэр гарсан.
Энэхүү шийдвэрийн хүрээнд 2011 оны гуравдугаар сарын 31-ний өдрөөс хойш нас барсан “Эрдэнэс Тавантолгой” ХК-ийн хувьцаа эзэмшигч 130 мянга гаруй иргэний хувьцаа, түүнд ногдох ногдол ашгийг хууль ёсны өвлөгчид өвлөн авах боломж бүрдэж байна.
“Эрдэнэс Тавантолгой” ХК-ийн хувьцааг хэрхэн өвлөн авах вэ?
Нэгдүгээрт, Хууль ёсны өвлөгч нь 158989 дугаарт нас барсан иргэний регистрийн дугаарыг том крилл үсгээр бичин илгээж, хувьцааны мэдээллээ шалгана.
Хоёрдугаарт, сум, хорооны Засаг даргаас шаардлагатай тодорхойлолт болон нотлох баримтаа авна.
Өвлүүлэгчийн нас барсны гэрчилгээг авч ирэх буюу байхгүй тохиолдолд Улсын бүртгэлийн байгууллагын нэг цэгийн үйлчилгээнээс лавлагаа авна;
Өвлүүлэх баримт бичгийн гол нотлох баримт болох Сум, хорооны Засаг даргаас дараах баримтуудыг гаргуулж авна. Үүнд:
Өвлүүлэгчийн хамгийн сүүлд оршин сууж байсан баг, хорооны Засаг даргын тодорхойлолтыг нас барсны гэрчилгээг үндэслэн авна;
Хүн ам, өрхийн бүртгэлийн дэвтрийн хуулбар (уг дэвтэр байхгүй тохиолдолд Засаг даргын гарын үсэг, тамга, тэмдгээр баталгаажсан тодорхойлолт);
Иргэний хуулийн 520 дугаар зүйлийн 520.1.2, 520.2-т заасан ээлжийн өвлөгч өвлөх тохиолдолд төрөл садангийн лавлагааг өвлөгч Улсын бүртгэлийн байгууллагаас иргэний бичиг баримттай биечлэн очиж авна.
Хууль ёсны өвлөгч болохыг нотлох баримт бичгүүд (хүүхэд нь өвлөх тохиолдолд төрсний гэрчилгээ эсвэл төрсний бүртгэлийн лавлагаа, эхнэр, нөхөр нь өвлөх тохиолдолд гэрлэсний бүртгэлийн лавлагаа, эцэг, эх нь өвлөх тохиолдолд өвлүүлэгчийн төрсний гэрчилгээ эсвэл төрсний. бүртгэлийн лавлагаа, төрөл садангийн лавлагаа, хугацаанаасаа өмнө өв нээлгэх тохиолдолд ХААТР-01 буюу хэдэн хүүхэд төрүүлсэн тухай лавлагааг авсан байх)-ийг бүрдүүлэн өв нээгдсэн газрын Нотариатад хандана.
Хууль ёсны өвлөгч нарын зарим нь өв хүлээн авахаас татгалзах тохиолдолд өвлөгч болохыг нотлох баримт бичгийг бүрдүүлж, өв хүлээн авахаас татгалзах хүсэлтийг өөрт ойрхон байрлаж буй нотариатаар, тухайн орон нутагт нотариат байхгүй бол нотариатын үүрэг гүйцэтгэгчээр гэрчлүүлнэ.
Нотариатч нь холбогдох баримт бичиг бүрдсэн нөхцөлд Нотариатын тухай хуульд заасны дагуу "Өвлөх эрхийн гэрчилгээ" бичиж, "Нотариатын цахим систем"-д байршуулах бөгөөд хувьцаа, түүнд хуваарилагдсан ногдол ашгийг шилжүүлэх тухай мэдээллийг Үнэт цаасны төвлөрсөн хадгаламжийн төвд цахим хэлбэрээр илгээнэ.
Дөрөвдүгээрт, E-Mongolia системээр үнэт цаасны данстай эсэхээ шалгаж, шаардлагатай бол брокерын компанид данс нээнэ.
Үнэт цаасны төвлөрсөн хадгаламжийн төв нь үнэт цаасаар гэрчлэгдсэн "Эрдэнэс Тавантолгой" ХК-ийн хувьцаа, ногдол ашгийг хууль ёсны өвлөгчийн үнэт цаасны дансанд бүртгэж баталгаажуулна.
Хүсвэл брокерын компаниар дамжуулан өөрийн банкны данс руу шилжүүлэн авах боломжтой.
