БНСУ-ын хөлбөмбөгийн шигшээ баг ДАШТ-аас хэсгийн шатанд хасагдсаны дараа ерөнхий дасгалжуулагч Хон Мён Бү албан тушаалаасаа огцорч буйгаа зарлалаа.
57 настай Хон Мён Бү Мексикийн баруун хэсгийн Запопан хот дахь шигшээ багийн бэлтгэлийн баазад болсон хэвлэлийн бага хурлын үеэр уг шийдвэрээ мэдэгджээ. Тэрээр "Өнөөдөр би БНСУ-ын эрэгтэй хөлбөмбөгийн шигшээ багийн ерөнхий дасгалжуулагчийн албан тушаалаас огцорч байна. Солонгосын хөлбөмбөгийг хайрлаж, шигшээ багаа дэмждэг хөгжөөн дэмжигчдээсээ уучлал хүсье. Бид тэдний хүлээсэн үр дүнд хүрч чадсангүй, үүний хариуцлагыг ерөнхий дасгалжуулагчийн хувьд би бүрэн хүлээнэ" гэжээ.
Хон Мён Бү 2024 оны долоодугаар сард хоёр дахь удаагаа шигшээ багийн дасгалжуулагчаар томилогдсон юм. Түүний гэрээ 2027 онд болох Азийн хөлбөмбөгийн аварга шалгаруулах тэмцээн хүртэл үргэлжлэхээр байв.
ДАШТ дахь бүтэлгүйтэл
БНСУ хэсгийн шатанд нэг хожил, хоёр хожигдолтойгоор 3 оноо авч, А хэсэгт гуравдугаар байрт оржээ. Тэд шилдэг найман багийн нэг болж шөвгийн 32-т шалгарах найдлага тээж байсан ч хэсгийн шатны сүүлчийн өдөр тэмцээнээ өндөрлүүлсэн юм.
Хон Мён Бү өмнө нь 2014 оны ДАШТ-д ч БНСУ-ыг хэсгийн шатнаас гаргаж чадаагүй. Тэрээр БНСУ-ын шигшээг ДАШТ-ий хоёр өөр тэмцээнд удирдсан цорын ганц дасгалжуулагч байв.
Хон Мён Бүгийн 2024 оны томилгоо анхнаасаа маргаан дагуулсан. Солонгосын хөлбөмбөгийн холбоо хэд хэдэн гадаад нэр дэвшигчийг судалсны эцэст тус холбооны удирдах албан тушаалтан Хон Мён Бүтэй богинохон уулзалт хийсний дараа дасгалжуулагчийн ажлыг санал болгосон нь шүүмжлэлд өртсөн юм.
Уг маргаан даамжирч БНСУ-ын парламент болох Үндэсний Ассамблейд хүрч, Хон болон Солонгосын хөлбөмбөгийн холбооны удирдлагуудыг сонсголд дуудаж байв. Мөн Соёл, спорт, аялал жуулчлалын яам тус томилгооны үйл явцыг шалгаж, Солонгосын хөлбөмбөгийн холбооны ерөнхийлөгч Чун Мон Гюу болон бусад удирдах ажилтнуудад хариуцлага тооцохыг шаардсан байдаг.
Хэсгийн шатны тоглолтууд
БНСУ хэсгийн шатанд:
Ялангуяа Өмнөд Африктай хийсэн тоглолтын дараа Хон Мён Бү өөрөө үүнийг "хэсгийн шатанд үзүүлсэн хамгийн муу тоглолт" гэж үнэлжээ.
Хон Мён Бү тоглогчийн хувиар дөрвөн удаа ДАШТ-д оролцож, БНСУ болон Японы хамтран зохион байгуулсан 2002 оны ДАШТ-д шигшээ багийг түүхэн амжилт болох хагас шигшээд хүргэсэн ахлагч.
Тэрээр хэвлэлийн бага хурлын үеэр сэтгүүлчдийн асуултад хариулаагүй байна. Түүнийг мягмар гарагт найман тоглогчийн хамт эх орондоо буцахаар төлөвлөж байгаа гэх мэдээлэл цацагджээ.
Хон Мён Бү нь энэ удаагийн ДАШТ-ий үеэр ажлаа өгсөн гурав дахь дасгалжуулагч болж байгаа бөгөөд өмнө нь Сабри Ламоучи (Тунис), Стив Кларк (Шотланд) нар мөн албан тушаалаасаа буусан юм.
