Авлигын эсрэг хуульд заасан хөрөнгө, орлогын мэдүүлгээ үнэн зөв гаргах үүргээ зөрчсөн албан тушаалтнуудад хариуцлага тооцож байна.
Авлигатай тэмцэх газраас 2026 оны эхний аравдугаар сарын байдлаар нийт 140 албан тушаалтны хөрөнгө, орлогын мэдүүлгийг хянан шалгахад 79 албан тушаалтан өөрийн болон гэр бүлийн гишүүдийн орлого, хөрөнгийг мэдүүлээгүй, худал мэдүүлсэн зөрчил илэрчээ. Үүнээс 51 албан тушаалтанд Авлигын эсрэг хуулийн 13 дугаар зүйлийн 13.8 дахь хэсэгт заасны дагуу хариуцлага тооцуулсан байна.
Тухайлбал, “Монголын газрын тос боловсруулах үйлдвэр” ТӨХК-ийн газрын дарга Н.Д, Нийслэлийн Биеийн тамир, спортын газрын удирдах албан тушаалтан С.С нарын нийт 9 албан тушаалтныг нийтийн албанаас халжээ.
Шалгалтыг иргэдээс ирүүлсэн гомдол, мэдээллийн мөрөөр болон төлөвлөгөөт хяналтын хүрээнд явуулж байгаа бөгөөд албан тушаалтнуудын хөрөнгө, орлого хууль ёсны эх үүсвэрээр бий болсон эсэх, мэдүүлсэн мэдээлэл үнэн зөв эсэхийг нарийвчлан шалгаж байгаа талаар Авлигатай тэмцэх газраас мэдээллээ.
