Засгийн газрын хуралдааны дараа Хот байгуулалт, барилга, орон сууцжуулалтын сайд Э.Бат-Амгалан мэдээлэл өглөө.
Тэрээр "Төрийн оролцоотой орон сууцны барилгын төсөл нийслэлийн есөн байршил дээр хэрэгжиж байна. Нийтдээ 21694 айл орох орон сууцны төслүүдийг 2025-2028 онд хэрэгжүүлнэ. Үүнээс гадна Хот байгуулалт, барилга, орон сууцжуулалтын яам Залуус 1, 2 хорооллын төслүүдийг ирэх жил хэрэгжүүлж эхлэх гэж байна. Улаанбаатар хотод хэрэгжиж байгаа орон сууцны төслүүд дээр миний биеэр ахлуулсан ажлын хэсэг байгууллаа. Манай ажлын хэсэг энэ онд багтаад эрүүл мэнд, боловсролын салбар, төрийн албан хаагчдад зориулсан орон сууцны хөтөлбөрийг судална. Хамгийн нэгдүгээрт ипотекийн зээлийн эх үүсвэр болон дээрх салбарын ажилтнуудын орон сууцны судалгааг хийнэ.
Нийслэлийн хэмжээнд боловсролын салбарт гэхэд 22 мянган ажилтан албан хаагч ажиллаж байна. Үүний тэн хагас нь орон сууц шаардлагатай байгаа. Тиймээс эдгээр салбарын ажилтнуудыг 5-10 хувийн урьдчилгаа төлөх нөхцөлтэйгөөр зургаан хувийн ипотект орох боломжийг судална" гэлээ.
