Орос улс Илон Маскийн Starlink хиймэл дагуулын холбооны системийг довтолгооны дрон дээрээ суурилуулж, Украинд илүү гүн цохилт өгөх боломжийг бүрдүүлж, улмаар НАТО-гийн нутаг дэвсгэрийн дотор хүртэл хүрэх нислэгийн хүрээг нь тэлж байгаа талаар шинжээчид болон Украины албаны хүмүүс мэдэгдлээ.
Украины Батлан хамгаалах яамны зөвлөх, цэргийн технологийн шинжээч Серхий Бескрестнов хэлэхдээ, Starlink-ийн хиймэл дагуулын холбоогоор удирддаг Оросын дронуудын үйлдсэн “хэдэн зуун” халдлагын нотолгоо Украины тал цугларсан гэжээ.
“Оросын дронууд цэргийн бай биш, харин ар талын болон фронтын хотууд, тэр дундаа орон сууцанд цохилт өгч байна. Үнэндээ энэ бол орчин үеийн энхийн харилцаа холбооны технологийг ашигласан терроризм” гэж Серхий Бескрестнов хэлсэн байна.
Starlink суурилуулснаар Москва Украины талаас хийдэг дронуудыг GPS болон радио дохиог нь саатуулж унагадаг цахим хамгаалалтыг тойрч гарч чаддаг болжээ.
Өмнө нь Орос улс шилэн кабелиар удирддаг дрон ашиглан ийм саатуулагчийг давж гарч байсан. Гэхдээ ийм дронууд электрон аргаар дарангуйлагддаггүй ч кабелийн уртаар нислэгийн зай нь хязгаарлагддаг. Starlink-тэй дронууд нь радио болон кабелиар удирддаг дронуудаас илүү хол нисэх боломжтой бөгөөд саатуулах боломжгүй. Маш хурдан холболтын ачаар Оросын нутгаас бодит цагт удирдах боломжтой болж, илүү нарийвчлалтай цохилт өгөх нөхцөл бүрдэж байна.
АНУ-ын хоригийн дагуу Starlink-ийг Оросод зарах, ашиглахыг хориглосон.
Оросын бусад дрон, пуужин илүү хол нисэх чадвартай ч тэдгээр нь илүү үнэтэй, том оврын, илрүүлэхэд амархан бөгөөд устгахад хялбар байдаг. Харин 250–500 ам.долларын үнэтэй Starlink Mini-тай энгийн дрон нь хэдэн арван мянган долларын үнэтэй дэвшилтэт загваруудтай дүйцэхүйц үр дүнтэй, илүү хямд байж чадна.
“Flash” хочоороо дрон технологийн хүрээнд танигдсан Бескрестнов Днипро хотод болсон BM-35 дроны цохилтын зургийг хуваалцаж, Starlink-тэй дрон 500 км хүртэл нисэх чадвартай гэжээ.
Мөн мягмар гараг (2026.01.27)-т Украины зүүн хэсэгт иргэний галт тэргэнд өгсөн үхэлд хүргэсэн агаарын цохилт нь электрон хамгаалалтыг нэвтэрч, хөдөлж буй галт тэрэгний яг дунд хэсгийг онох чадвартай байсан тул торон радио модем эсвэл магадгүй Starlink-тэй Shahed дроноор хийгдсэн байх магадлалтай гэнэ.
Энэ сарын эхээр Flash Украины Олон нийтийн нэвтрүүлэгч Суспільне-д ярилцлага өгөхдөө, Чернигов мужид Украины эрчим хүчний байгууламжуудыг цохиход Starlink-тэй Molniya дронуудын сүргийг ашигласан гэж мэдэгджээ. Molniya дронууд нь фанераар хийсэн, маш энгийн, хямд бөгөөд хэдэн арван милийн зайд нисэх чадвартай.
Түүний хэлснээр Starlink технологийн ачаар гурван дрон тутмын нэг нь байндаа хүрч чадсан байна. Мөн пүрэв гарагт Павлоградаас фронтын шугамаас ойролцоогоор 50 км зайд шөнө дахин Starlink-тэй Molniya дронууд ашиглагдсан гэж мэдэгдсэн байна.
АНУ-д төвтэй Дайны судалгааны хүрээлэн (ISW) мэдээлэхдээ, хэрэв 500 км-ийн нислэгийн хүрээ үнэн бол Орос эсвэл эзлэгдсэн Украины нутгаас хөөрсөн Starlink-тэй BM-35 дронууд “Украины ихэнх хэсэг, Молдов бүхэлдээ, Польш, Румын, Литвийн зарим хэсэгт” хүрэх боломжтой гэжээ.
