Европ-Монголын Хамтарсан Худалдаа Аж Үйлдвэрийн Танхим (EuroChamber Mongolia) Голомт банктай хамтран Европын Холбоо болон Монгол Улсын эдийн засаг, бизнесийн түншлэлийг өргөжүүлэх зорилготой "Бизнес үдийн уулзалт"-ыг зохион байгууллаа.
Тус уулзалтад Монгол Улсад суугаа болон хавсран суугаа ЕХ-ны гишүүн 27 орны Элчин сайд нар болон дипломат төлөөлөгчид оролцож, хоёр талын эдийн засгийн хамтын ажиллагааг шинэ шатанд гаргах, хөрөнгө оруулалтыг нэмэгдүүлэх боломжуудын талаар санал солилцсон байна.
Хурлын үеэр талууд худалдааны эргэлтийг нэмэгдүүлэх, тогтвортой хөрөнгө оруулалтыг дэмжих, ялангуяа Монголын хувийн хэвшлийнхэнд тулгарч буй боломж, сорилтуудын талаар голчлон хэлэлцлээ.
Уулзалтын үеэр Европ-Монголын Хамтарсан Худалдаа Аж Үйлдвэрийн Танхимын Гүйцэтгэх захирал Э.Эрдэнэ хоёр талын эдийн засгийн гүүр болоход хувийн хэвшлийн оролцоо чухал болохыг тэмдэглэж, "Монгол Улс болон Европын Холбооны орнуудын худалдаа, хөрөнгө оруулалтыг бодит ажил хэрэг болгоход дотоодын аж ахуйн нэгжүүдийг чадавхжуулах, тэдэнд шинэ зах зээлийн хаалгыг нээж өгөх нь манай танхимын гол зорилго" хэмээн онцлов.
Арга хэмжээний хамтран зохион байгуулагчаар ажилласан Голомт банкны ОУБГ - Худалдаа, бүтцэт санхүүжилтийн хэлтсийн захирал Ч.Үнэнгэрэл хэлэхдээ, Европ нь Монгол Улсын гадаад худалдааны чухал бүс нутаг болохыг онцлон тэмдэглээд, Голомт банк нь Европ дахь түнш банк, санхүүгийн байгууллагуудтай хамтран хүнс, хөдөө аж ахуй, уул уурхай, худалдаа, үйлдвэрлэл, зам тээвэр зэрэг стратегийн ач холбогдолтой маш олон төслүүдийг хамтран санхүүжүүлж ирснийг дурдсан юм. Мөн Монгол Улсаас Европын орнууд руу нээгдсэн баталгаа, аккредитивийн үйлчилгээний 67 хувийг бүрдүүлдэг банкны хувьд цаашид хамтын ажиллагаагаа улам өргөжүүлж, хоёр бүс нутгийн бизнес эрхлэгч аж ахуйн нэгжүүдийн оролцож буй шинэ төслүүдийг санхүүжилтийн цогц шийдлээр дэмжин ажиллахад үргэлж нээлттэй байгаагаа илэрхийллээ.
Энэхүү уулзалт нь Монгол-Европын худалдаа, эдийн засгийн харилцааг идэвхжүүлэх, шинэ түншлэлийн суурийг тавихад чухал ач холбогдолтой үйл явдал боллоо гэж зохион байгуулагчид дүгнэв.
Европ Монголын Хамтарсан Худалдаа Аж Үйлдвэрийн Танхим нь Европын Холбоо болон Монгол Улсын эдийн засгийн харилцааг бэхжүүлэх, хоёр талын хувийн хэвшлийн хамтын ажиллагааг дэмжих, төр-хувийн хэвшлийн түншлэлийг хөгжүүлэх эрхэм зорилготой юм.
