Куба улсын эрчим хүчний ноцтой хямрал улам бүр хүндрэх гэж байгааг тус улсын Эрчим хүч, уул уурхайн сайд Винсете де ла О Леви анхаарууллаа.
Гуравдугаар сарын сүүлээр ОХУ-аас хандивласан газрын тос аль хэдийн дууссан гэж де ла О Леви улсын телевизээр хийсэн тусгай мэдэгдлийн үеэр хэлсэн байна. “Нөхцөл байдал маш хүнд байна, улам халуун болж байна” гэж хэлсэн түүний үг Карибын тэнгисийн арал дээр зуны халуун улирал эхэлж, эрчим хүчний хэрэглээ өсөж буйг онцолжээ.
Сүүлийн өдрүүдэд кубчуудын жижиг бүлгүүд шөнийн цагаар гудамжинд гарч, сав суулга балбан удаан үргэлжилж буй цахилгаан тасалдлыг эсэргүүцэх болсон байна.
Нүүр царай нь түгшсэн байдалтай харагдсан албан тушаалтан улсын цахилгаан сүлжээг ажиллуулах нефтийн нөөц бараг бүрэн шавхагдсан гэж хэд хэдэн удаа онцолжээ. “Манайд дизель түлш огт байхгүй” гэж тэр хэлсэн байна.
Нэгдүгээр сард АНУ Кубын нефть ихтэй холбоотон Венесуэль халдсаны дараа, мөн Дональд Трампын засаг захиргаа Кубын засгийн газрыг АНУ-ын үндэсний аюулгүй байдалд заналхийлэл учруулж байна гэж зарласнаар коммунист засаглалтай арал нефтийн бүслэлтэд орсон байна.
Оросын хандивласан нэг танкер нефтиэс бусад бүх нийлүүлэлт дөрвөн сараас илүү хугацаанд АНУ-ын хоригт өртсөн гэж Кубын албаныхан мэдэгджээ.
Тэрхүү нефтийн нөөц тавдугаар сарын эхээр дууссан бөгөөд кубчууд өдөржин, зарим тохиолдолд бүтэн өдрийн турш үргэлжлэх цахилгаан тасалдалтай нүүр тулж байгаа аж.
Зарим иргэд цахилгаан скүүтер, гар утас зэрэг зүйлээ цэнэглэх хэмжээний цахилгаан ч авч чадахгүй байна гэж гомдоллох болжээ. Олон хүн цахилгаан түр зуур орж ирэх шөнийн цагаар сэрж, хувцсаа угаах, хоол хийх зэрэг наад захын ажлаа амжуулдаг болсон байна.
Де ла О Леви хэлэхдээ, БНХАУ-аас хандивласан нарны хавтангийн ачаар арал нарны эрчим хүчийг улам их ашиглаж байгаа ч үүлэрхэг цаг агаар болон уур амьсгалын нөхцөлөөс шалтгаалан үйлдвэрлэж буй эрчим хүч ихээхэн хэлбэлздэг гэжээ.
Мөн үйлдвэрлэсэн цахилгааныг хадгалах өндөр өртөгтэй батарейгүй тул шөнийн оргил хэрэглээний үед эдгээр хавтан төдийлөн тус нэмэр болдоггүй байна.
“Гавана хотод цахилгаан тасалдал одоо өдөрт 20-22 цагаас давж байна” гэж де ла О Леви мэдэгджээ.
Трампын засаг захиргаа Кубын засгийн газрыг улс төр, эдийн засгийн шинэчлэл хийх, дээд удирдлагыг огцруулахыг шаардаж, биелүүлбэл нь эдийн засгийн хориг арга хэмжээгээ цуцална гэж мэдэгддэг.
Трамп Кубын засгийн газар нуран унахын ирмэг дээр байгаа учир аралд цэргийн хүч хэрэглэх боломжийг судалж байгаа гэж хэлжээ.
Кубын албаныхан энэ дарамтын кампанит ажлыг эрс няцааж, аливаа цэргийн оролцоог хүчээр эсэргүүцнэ гэж мэдэгдсэн байна.
Лхагва гарагт гарсан АНУ-ын Төрийн департаментын мэдэгдэлд, Кубын коммунист тогтолцоонд “утга учиртай шинэчлэл” хийхэд зориулж аралд 100 сая ам.долларын тусламж санал болгож буйг дурджээ. “Манай тусламжийн саналыг хүлээн авах эсвэл амин чухал тусламжаас татгалзах эсэх нь Кубын дэглэмийн шийдвэр бөгөөд тусламжид саад учруулсан хариуцлагыг эцэст нь Кубын ард түмний өмнө хүлээнэ” гэж уг мэдэгдэлд дурдсан байна.
