"Банкны салбарын тойм” судалгааны 2025 оны эхний хагас жилийн үзүүлэлтүүдийг Монголын банкны холбооноос өнөөдөр танилцууллаа.
Мөн үеэр Монгол улсын макро эдийн засгийн нөхцөл байдлыг Банк санхүүгийн академийн ахлах эдийн засагч Ч.Сосорбарам мэдээлэв.
Тэрээр “Эхний хагас жилд ДНБ 5.6 хувь өссөн. Үүний дийлэнх хувийг ХАА-н өсөлт эзэлнэ. Уул уурхайн салбар хүлээлтэд доогуур байсан. Түүнийг дагаад худалдаа, үйлчилгээ, тээврийн салбар уналтад орсон. Харин барилга, боловсрол, үйлчилгээний салбар аажмаар сэргэж байгаа нь эдийн засгийн өсөлтийг дэмжиж байна.
Импорт гурван хувиар өссөн. Монголчуудын автомашины хэрэглээ буурахгүй байгаа нь импортын хэмжээ өсөхөд нөлөөлж байна. Төлбөрийн тэнцэл 458 сая ам.долларын алдагдалтай гарсан. Гадаад бараа үйлчилгээ болон аялал жуулчлалын үнэ өссөн нь урсгал дансыг алдагдалтай гарахад нөлөөлж байна. Нөгөө талдаа, гаднын хөрөнгө оруулалт аажмаар сэргэж байгаа нь урсгал дансны алдагдал хэт их байхаас хамгаалж байна. Төгрөгийн бодит ханш харьцангуй суларч байна.
Төсвийн тэнцэл 758 тэрбум төгрөгийн алдагдалтай гарсан. Орлого өмнөх оноос 6 орчим хувиар буурсан бол төсвийн зардал 8.2 хувь нэмэгдсэн" гэв.
