Хууль зүй, дотоод хэргийн сайд С.Амарсайхан цаг үеийн асуудлаар мэдээлэл өглөө.

Тэрээр “Монгол Улсад хар тамхины хамгаалагчид байна. Өнөөдөр хүүхэд багачууд олон зуугаараа үүнд өртөж байна. Би хэдхэн хоногийн өмнө хар тамхи, архины эмчилгээний газарт очиж танилцахад тэнд 17-20 орчим насны хүүхэд, залуучууд гурван жилийн хугацаанд 500-600 сая төгрөгийг хар тамхи худалдаж авахад зарцуулсан байна. 17 настай хүүхдээс “Чиний ард хэчнээн хүүхэд байгаа вэ?” гэж асуухад 200-300 хүүхэд өдөр тутамдаа хар тамхи хэрэглэдэг гэж хариулсан. Өнөөдөр манайд хар тамхины хэрэглээ хэдэн зуун мянгад тоологдох хэмжээнд хүрсэн. Үүнийг өнөөдрийн хууль сахиулах байгууллагын ялзарч, илжирсэн хурандаа, генералууд дарж ирсэн.

Хар тамхитай тэмцэх төсвийг зориуд улсын төсвөөс хасаж ирсэн. Намайг дөрөвдүгээр сард анх ажил авахад Монгол Улсын хэмжээнд хар тамхины тест 24 ширхэг байгаа тул хар тамхи илрүүлэх тест авч өгөх хүсэлтийг Цагдаагийн ерөнхий газраас ирүүлсэн. Тийм учраас би хар тамхитай тэмцэх урт болон богино хугацааны стратеги гаргах тушаал өгсөн.

Хар тамхийг зориуд эзэнгүй болгож, алба хаагчдынх нь орон тоог цөөлснөөр Монгол Улсыг дамжуулагч биш, хэрэглэгч болгосон. Одоо цаашлаад бусад улс орнууд биднийг үйлдвэрлэгч болгохоор онилоод байна. Үүний цаана манай улс төрд нөлөө бүхий хүмүүс, урлаг, соёлын одууд, аж ахуйн нэгжийн захирлууд, төрийн өмчит компанийн захирлууд ч багтаж байгаа. Хүүхэд, залуучуудыг хүртэл үүнд автуулах, нуун дарагдуулах үүднээс Цагдаагийн байгууллага дотроос хүртэл “Хэргийг бүү мөрд, зогсоо, хаа” гэсэн үүрэг өгч байгаа” гэлээ.