МАН-ын ерөнхий нарийн бичгийн дарга Я.Содбаатар аймаг, сумын ИТХ-ын нөхөн сонгуулийн үр дүнгийн талаар мэдээлэл хийлээ.
Тэрээр "Аймаг, сумдын ИТХ-ын 2026 оны нөхөн сонгууль өчигдөр улс орон даяар зохион байгуулагдлаа. Энэ жилийн нөхөн сонгуулиар таван аймгийн есөн суманд аймгийн ИТХ-ын есөн мандат, 15 аймгийн 37 мандат дээр сумын ИТХ-ын нөхөн сонгууль зарлагдсан. Сонгуульд МАН-аас 42, АН-аас 41, ХҮН намаас гурав, ИЗНН, Иргэдийн оролцооны нэгдэл, Их нам зэргээс тус бүр нэг, бие даагч тав нийт 93 нэр дэвшигч сонгуулийн санал хураалтад оролцож өрсөлдлөө. Эцсийн дүнгээр, 46 мандатаас 26 мандат буюу МАН 56.5 хувиар ялалт байгууллаа. АН 17 мандат буюу 36.9 хувь, ХҮН нам нэг мандат, бие даагч хоёр хүн сонгогдлоо. Аймгийн ИТХ-ын есөн мандатад МАН ялалт байгууллаа.
Аймгийн ИТХ-ын нөхөн сонгуульд бид ач холбогдол өгсөн. Увс, Өвөрхангай, Дундговь, Төв, Дархан-Уул аймагт сонгууль явагдсан учир энэ удаагийн сонгууль бол ард иргэдийн ерөнхий нөхцөл байдал, уур амьсгалыг мэдрэх, дараа дараагийн улс төрийн үйл явцын өнгө тодорхойлно гэж үзэж, ажиллалаа. МАН-д итгэж сонголтоо хийсэн ард иргэддээ баярлалаа. Итгэлийг зүтгэлээр хариулна. 2024 оны мөрийн хөтөлбөрт туссан ажил, нийгэм эдийн засгийн асуудлыг шийдвэрлэх ажлыг эрчимжүүлнэ" гэв.
МАН-ын ерөнхий нарийн бичгийн дарга Я.Содбаатар сэтгүүлчдийн асуултад хариулахдаа "Ирэх оны Ерөнхийлөгчийн сонгуульд нэр дэвшигчээр хэнийг сонгох вэ гэдгийг МАН удирдлагын түвшинд ярьж байгаа. Ард түмэн ямар Ерөнхийлөгчийг хүсэж байна, хэнийг нэр дэвшүүлэхийг хүсэж байгаа вэ гэдэгт төвлөрч ажиллах нь зөв гэж үзэж байгаа. Намын анхан шатны байгууллага, ард иргэдээсээ асууж байж нэр дэвшигчээ тодруулах арга, аргачлалыг сонгож байна.
Өнгөрсөн жилээс хойш МАН парламент дахь бүлэг дотроо хагарлаа. Үзэл бодол, үйл ажиллагааны хувьд зөрчилдсөн талууд бий. Энэ үйл явц МАН-ын 31-р хурал дээр цэглэгдсэн. Шинэ намын даргаа өндөр хувьтай сонгож гаргасан. АН-ын удирдлагаас 12 насаар дүү удирдлага сонгосон. Энэ үеэс МАН ойлголцсон, асуудал шийдэгдсэн. 30:38 гэсэн хуваагдал байхгүй. Хувь хүмүүс парламентын гишүүний хувиар байр сууриа илэрхийлэх хандлага бол байна. Энэ бол бүрэн эрхийн асуудал. Үүнээс улбаалж хагарал, бутралтай харагдах байдал үүсэж байгаа байх. Гэхдээ алив хууль дээр 68-ын бүлгээр асуудалд хандаж байгааг харж байгаа байх.
Нийслэлийн намын хорооны хурлын асуудлыг одоогоор хөндсөн зүйл алга. Нийслэлийн шинэ Засаг дарга томилогдсонтой холбоотойгоор нийслэлийн намын хорооны асуудал намын гишүүдийн зүгээс гарч байгаа. Гэхдээ хуралдах тов албан ёсоор гарсан зүйл алга.
Мөн зарим судалгааны байгууллагууд зохион байгуулалттайгаар захиалгат судалгаа гаргаж, тархи угаалт хийж байна. МАН саяхан томоохон судалгаа авсан. Өнөөдөр МАН 19.6, АН 16.7 хувийн рейтингтэй байна. Судалгаанаас анхаарах зүйл нь, аль ч улс төрийн намыг дэмжихгүй гэх массын хувь өндөр байна. Гэхдээ бодит дүн бол сонгуулийн дүн. Саяхны аймаг, сумдын нөхөн сонгуулиас үүнийг харлаа. Ард түмнийхээ итгэлийг алдахгүй, хүлээлтэд хүрч ажиллах шаардлага бидэнд байна" гэлээ.
