Суданы Өмнөд Кордофан мужид НҮБ-ын хүмүүнлэгийн тусламжийн цуваа агаарын цохилтод өртөж, нэг жолооч амиа алдсан талаар НҮБ-ын Дэлхийн хүнсний хөтөлбөр (WFP) мэдээлжээ.
Дэлхийн хүнсний хөтөлбөр ням гарагт гаргасан мэдэгдэлдээ, хүнсний тусламж тээвэрлэж явсан ачааны машинууд халдлагад өртөх үедээ “хүмүүнлэгийн тусламжийн тээврийн хэрэгсэл гэдэг нь тодорхой харагдахаар тэмдэглэгдсэн” байсан гэжээ. Тус байгууллага халдлагыг хэн үйлдсэнийг мэдээлээгүй байна.
Халдлага бямба гарагт Өмнөд Кордофан мужийн засгийн газрын Суданы Зэвсэгт хүчний хяналтад байдаг хоёр хотын хооронд цуваа зорчиж байх үед болжээ.
Кордофан бүс нутагт 2025 оны сүүлээр байлдааны ажиллагаа эрчимжиж, Суданыг хяналтдаа авахын төлөө тэмцэж буй Суданы Зэвсэгт хүчин болон хагас цэрэгжүүлсэн Шуурхай дэмжлэгийн хүчний (RSF) хоорондын стратегийн гол тулааны талбар болсон байна. Тус хоёр талын иргэний дайн гурван жил гаруй үргэлжилж байгаа юм.
Дэлхийн хүнсний хөтөлбөрийн тусламжийн машинуудад халдсан хэргийн улмаас учирсан хохирлын хэмжээ болон бусад дэлгэрэнгүй мэдээллийг тогтоох ажил хийгдэж байна.
2023 оны дөрөвдүгээр сард дайн эхэлснээс хойш Суданд гарсан халдлагын таван тохиолдол тутмын нэг нь Кордофан бүс нутагт бүртгэгдсэн. Арми сүүлийн үед хэд хэдэн удаа давуу байр суурь эзэлж, хойд хэсэгт хяналтаа бэхжүүлсэн бол Шуурхай дэмжлэгийн хүчин баруун нутгийн ихэнх хэсгийг хяналтдаа байлгаж байна. Өмнөд Кордофан мужийн хяналтын асуудал одоогоор маргаантай хэвээр байгаа юм.
Суданы Зэвсэгт хүчин болон Шуурхай дэмжлэгийн хүчин дайны явцад дроныг улам өргөн ашиглах болж, Хойд Кордофан дахь хотууд руу хийх халдлага улам олширч, хүний амь эрсдэх тохиолдол нэмэгдэн, бүс нутгийн иргэний дэд бүтэц мөн халдлагад өртөж байна.
Иргэний дайны улмаас Суданд 14 сая хүн орон гэрээсээ дүрвэхэд хүрч, улс орон орчин үеийн түүхэн дэх хамгийн хүнд хүнсний хямралуудын нэгэнд орж, хэдэн арван мянган хүн амиа алджээ.
Дэлхийн өлсгөлөнгийн нөхцөл байдлыг үнэлдэг тэргүүлэх байгууллага болох Хүнсний аюулгүй байдлын үе шатны нэгдсэн ангиллын (IPC) үнэлгээгээр, хоёрдугаар сараас тавдугаар сарын хооронд Суданы 19.5 сая орчим хүн буюу нийт хүн амын 41 хувь нь хүнсний хүнд хямралтай тулгарч байжээ.
Тэдгээрийн таван сая гаруй хүн амь насанд нь аюул учруулах хэмжээнд хүрсэн туйлын хүнд хүнсний хомсдолтой байсан бол 135 000 орчим хүн өлсгөлөнд нэрвэгдэх эрсдэлтэй байв.
