Монголын электрон спортын холбоо /MESA/ S-tier буюу дэлхийн дээд түвшний тэмцээн болох “BLAST Premier Open Ulaanbaatar-2027” тэмцээнийг зохион байгуулах болсон талаар мэдээлэл хийлээ. 1.2 сая ам.долларын шагналын сантай тус тэмцээнийг гурван жил дараалан зохион байгуулах эрхийг MESA авчээ.
BLAST Premier Open тэмцээн нь жилд хоёр удаа зохион байгууллагддаг электрон спортын дээд түвшний тэмцээн юм. Ингэхдээ хоёр өөр улсад болдог байсан бол Улаанбаатар хот жилийн эхний хагаст болдог тэмцээнийг гурван жил дараалан хийх эрхийг авчээ.
“BLAST Premier Open Ulaanbaatar-2027” тэмцээн 1 250 000 ам.долларын шагналын сантай бөгөөд дэлхийн шилдэг 16 баг өрсөлдөнө. Тэмцээн 2027 оны тавдугаар сарын 10-23-ны өдрүүдэд AIC Steppe Arena-д зохион байгуулагдана. Тэмцээнд тоглох 16 багийн 11 нь дэлхийн VRS чансааны эрэмбээр уригдах бол үлдсэн таван эрхийг Ази тивийн сонгон шалгаруулалтаас хоёр, Европ, Хойд Америк, Өмнөд Америкийн бүсүүдээс нэг нэг баг сонгогдох юм.
BLAST-ийн Зах зээл, хот хариуцсан дэд ерөнхийлөгч Жеймс Вүүллард болон Монголын электрон спортын холбоо “BLAST Premier Open Ulaanbaatar-2027” тэмцээнийг зохион байгуулах хамтын ажиллагааны санамж бичиг байгууллаа.
МОНГОЛ УЛСАД ТЭМЦЭЭН ЗОХИОН БАЙГУУЛАХ БҮРЭН БОЛОМЖТОЙ ГЭЖ ҮЗСЭН
Жеймс Вүүллард (BLAST-ийн Зах зээл, хот хариуцсан дэд ерөнхийлөгч)
Монгол Улсыг сонгосон шалтгаан бол Esport-ийг дэмжигчийн тоо өссөн. Мөн соёлоо дагаад аялал жуулчлал нь хөгжиж байна. Улаанбаатарт олон улсын тэмцээн, хурал зөвлөгөөн зохион байгуулсан туршлагыг харлаа. Мөн тэмцээн зохион байгуулах байгууламж боломж байна. Хамгийн сүүлд COP17 олон улсын хурлыг зохион байгууллаа. Тиймээс бид ирэх онд болох тэмцээнийг Монгол Улсад хийх боломжтой юм байна гэж харсан. Мөн The MongolZ баг бол мянга мянган дэмжигчтэй. Esport дэлхий нийтэд хүчтэй хөгжиж, гурван тэрбум орчим хүн тоглож байна. Цаашид энэ спортыг сонирхох сонирхогчийн тоо нэмэгдэж, үүнийг дагаад олон улсын хөрөнгө оруулагчдыг татах боломж улам их нээлттэй болно. Аль хэдийнэ үзэгч, фанатуудаа авчихсан энэ төрлийн тэмцээн цаашид илүү их хүчтэй болж ирнэ. Би 2025 онд Остин хотод "The MongolZ" багийг дэмжиж байсан. Өнгөрсөн жил маш онцгой амжилтыг үзүүлсэн шүү дээ. Мөн Монголын ард түмэн "The MongolZ" багийг төв талбайдаа цуглан дэмжиж байсныг харсан. Тиймээс бидний хувьд Монгол Улсад тэмцээн зохион байгуулах бүрэн боломжтой гэж үзсэн байгаа.
ДЭЛХИЙН ШИЛДЭГ БАГУУДЫН ТОГЛОЛТЫГ ДЭРГЭДЭЭС ҮЗЭХ БОЛОМЖТОЙ БОЛЛОО
Ц.Мөнхтүвшин (Монголын электрон спортын холбооны ерөнхийлөгч)
Манай холбооноос BLAST-ийг эх орондоо зохион байгуулах болсон нь Азийн хувьд энэ тэмцээнийг зохион байгуулдаг гурав дахь хот болж байна. Сингапур, Шанхайд сүүлийн арваад жил тэмцээн болж байна. Гэтэл Монголын багийн амжилтыг дагаад бидэнд бас тэмцээнийг зохион байгуулах эрх ирж байна. Улаанбаатар хот дэлхийн шилдэг багууд уригдан оролцдог тэмцээнийг зохион байгуулах хотыг нэг боллоо. Өнгөрсөн туршлагаас харж байхад тэмцээнд оролцож байгаа дэлхийн чансаа өндөр багийг дагалдан ирэх 500 орчим фанатууд байдаг. Мөн манай улсын хөршүүдээс энэ тэмцээнийг үзэх гэж олон мянган дэмжигчид ирнэ. Мэдээж энэ тэмцээнийг үзэхээс гадна Монгол Улсад аялах жуулчдын тоо эрс нэмэгдэнэ. Бид зурагтаар хардаг байсан дэлхийн шилдэг багуудын тоглолтыг дэргэдээс нь харах боломжтой боллоо. Тиймээс Монголын багуудаа илүү сайн дэмжээрэй, бидэнтэй хамт байгаарай. Энэ сайхан хөгжлийг золгоод аваарай, бас энэ боломжийг ашиглаад бизнесийн хамтрагч болоорой, энэ тэмцээнийг ашиглаад дэлхийн багуудтай хамт байгаарай. Бид энэ тэмцээнийг хийхэд хамгийн гол зүйл нь дэмжлэг байдаг. 2007 оноос хойш энэ спортыг хөгжүүлэх гэж холбооны үйл ажиллагаа идэвхитэй болж ирсэн. Тиймээс бид дэлхийн хэмжээний багтай болж чадсан юм чинь одоо дэлхийн хэмжээний тоглолтыг нь эх орондоо хийх боломж бүрдлээ. Энэ боломжийг угтан авч бизнесийн байгууллагуудаа дэмжихийг уриалж байна. Сагсан бөмбөг, хөлбөмбөг шиг хурдтай хөгжиж байгаа Esport-ийн дэлхийн том тэмцээн Монголд болох гэж байгаа нь бидний хувьд маш том давуу тал болж байна.
2027 ОНД ДЭЛХИЙН ШИЛДЭГ 16 БАГ ИРЭХ УЧИР МАШ ТОМ ХАРИУЦЛАГА ИРЛЭЭ
А.Амаржаргал (Монголын электрон спортын холбооны нарийн бичгийн дарга)
Бид энэ тэмцээнийг эх орондоо гурван жил дараалан зохион байгуулах эрхийг авлаа. Монгол Улсад олон улсын тэмцээнийг хийх боломж бүрдлээ. Мэдээж энэ эрхийг авахад амар байгаагүй. "The MongolZ" баг олон улсад амжилттай тоглож байна. Энэ нь биднийг энэ тэмцээнийг эх орондоо зохион байгуулахад маш том түлхэц боллоо. Бид энэ тэмцээнийг зохион байгуулснаар маш их туршлагыг хуримтлуулна. Мэдээж дэлхийн шилдэг 16 баг оролцох учир маш том хариуцлага байгаа. Бид 2027 оноос эхлэн гурван жил дараалан зохион байгуулах учир эхний тэмцээнээс эхлэн маш сайн үр дүнтэй хийхээр төлөвлөсөн. Шилдэг багууд ирэх учраас тэдний аюулгүй байдлаас эхлээд олон шат дараалсан ажлууд байна. Мөн The MongolZ багийг дагаад дараа дараагийн багууд гарахад маш том түлхэц болно. Тиймээс бид бүхэн дэлхийн шилдэг багууд уригдан оролцдог энэ тэмцээнийг эх орондоо амжилттай зохион байгуулах ажлаа эхлүүлж байна. Бид арваад жилийн өмнө сүмогийн их аваргуудын барилдааныг Японд очиж үзэж хүсэл мөрөөдөлтэй байсан шүү дээ. Гэхдээ энэ боломж хүн бүхэнд олдоод байдаггүй. Гэтэл өнөөдөр бид Esport-ийн дэлхийн хэмжээний шилдэг багуудтай болсон байна. Үүнийг дагаад том хэмжээний тоглолт Улаанбаатарт болох боллоо.
