Хууль зүй, дотоод хэргийн дэд сайд Д.Мөнх-Эрдэнэ мэдээлэл хийлээ.
Тэрээр "Өнөөдрийн Засгийн газрын хуралдаанаар мансууруулах эм, сэтгэцэд нөлөөлөх бодисын хэрэглэлтэд хяналт тавих тухай хуулийн шинэчилсэн найруулгын төслийг дэмжиж УИХ-д өргөн мэдүүлэхээр шийдвэрлэлээ. Хар тамхины хэрэглээ сэтгэл эмзэглүүлж байна. Засгийн газрын зүгээс мансууруулах эм, сэтгэцэд нөлөөлөх бодисын хэрэглээ Үндэсний аюулгүй байдалд заналхийлэх хэмжээнд хүрсэн гэж үзэж байгаа. Анх 2022 онд энэ төрлийн гэмт хэрэгтэй холбоотой харилцааг зохицуулах хууль баталж байхад хоёр бүртгэгдэж байсан бол өнөөдөр тогтмол өссөөр 2025 оны байдлаар 307 гэмт хэрэг, 394 зөрчил бүртгэгдсэн байна. Өмнөх онтой нь харьцуулахад гэмт хэргийн өсөлт 20, зөрчлийн өсөлт 26.6 хувьтай байна.
Засгийн газар өнгөрсөн оны наймдугаар сард хар тамхитай тэмцэх бодлогоо зарлаж эрх зүйн шинэчлэлтийг яаралтай хийх мөн төрлийн гэмт хэрэгтэй тэмцэж байгаа хууль сахиулах байгууллага, хар тамхитай тэмцэх албыг байгуулж бэхжүүлэх шийдвэр гаргасан. Үүний үр нөлөөгөөр энэ төрлийн гэмт хэргийн илрүүлэлт нэмэгдэж байгааг үгүйсгэхгүй.
Хар тамхины аюул заналыг таниулах ойлгуулах нийгэмд мэдүүлэх энэ чиглэлээр хийх ажлууд их байна. Төрийн бүх шатнаас авч хэрэгжүүлэх үйл ажиллагааг тодорхой болгож байгаа. Нөгөө талаас олон улсын конвенцэд хүлээсэн үүргийн хүрээнд үндэсний аюулгүй байдалд нөлөөлөхүйц онц ноцтой гэж үзэж байгаа учраас энэ төрлийн харилцааг бүхэлд нь төрийн хатуу хяналтад авах бүх төрлийн үйл ажиллагааг тусгай зөвшөөрөлтэй эрхлэх зэрэг зохицуулалтууд тусгасан. Энэ төрлийн гэмт хэрэгтэй дайн зарлаж зохион байгуулж ашиг хүртэж байгаа иргэдэд хүлээлгэх хариуцлагыг чангатгах, төрийн байгууллагуудын хэрэгжүүлэх үйл ажиллагааг тодорхой болгох, гэм буруутай этгээдүүд ял завших боломжийг хаах чиглэлээр хуулийн төслийг боловсруулсан.
Донтох эмгэгтэй хүмүүст авах арга хэмжээг тодорхой болгож байгаа. Тухайн хүмүүсийг эмчлэх, сэтгэц болоод бие мах бодийн хувьд эрүүлжүүлэх ажил хийнхэ. Өнөөдөр хүчин төгөлдөр үйлчилж байгаа Зөрчил, Эрүүгийн хариуцлага учир дутагдалтай байна. Хар тамхинд донтсон хүмүүсийг эмчлэх олон улсын стандартыг Монголд нэвтрүүлэх шаардлагатай.
Мансууруулах эм, сэтгэцэд нөлөөлөх бодис хэрэглэж буй хүмүүсийг насны ангиллаар нь авч үзэхэд ихэнх нь 13-35 насны залуучууд байна" гэв.
