
ЮНЕСКО-гийн “Дэлхийн дурсамж” хөтөлбөрийн Ази, Номхон далайн бүсийн хорооны XI Ерөнхий чуулган энэ сарын 2-6-ны өдрүүдэд Индонез Улсын нийслэл Жакарта хотноо болсон юм. Чуулганаар улс орнуудаас нэр дэвшүүлсэн 28 баримтат өвийг хэлэлцэж, 10 улсын 21 өвийг шинээр бүртгэн, гэрчилгээг нь гардуулжээ.
Монгол Улсаас нэр дэвшүүлсэн XIX зууны түүх, соёлын дурсгал болох “Бурхан багшийн шүтээн зурагт намтар” бүтээлийг ЮНЕСКО-ийн “Дэлхийн дурсамж” хөтөлбөрийн Ази, Номхон далайн бүсийн баримтат өвийн жагсаалтад шинээр бүртгэлээ.
Шинээр бүртгэгдсэн “Бурхан багшийн шүтээн зурагт намтар” нь Г.Занабазарын нэрэмжит Дүрслэх урлагийн музейн сан хөмрөгт хадгалагддаг XIX зууны бүтээл юм. Тус өв нь 28х22 см хэмжээтэй цаасан дээр шороон будгаар зурсан, Бурхан багшийн намтрыг өгүүлсэн 34 цуврал зургаас бүрддэг.

Энэхүү бүтээлийг XIX зууны үед амьдарч байсан, нэр нь тодорхойгүй Монголын бурханч лам туурвижээ. Тэрээр Бурхан багшийн өмнөх төрлүүдийн түүхээр дамжуулан үнэнч шударга байдал, энэрэнгүй сэтгэл, ёс суртахуун, зөв сэтгэлийг эрхэмлэх үзэл санааг уран зургийн аргаар илэрхийлсэн байна.
Уг өвийг ЮНЕСКО-гийн бүсийн жагсаалтад бүртгүүлэх судалгаа, баримт бичгийг Г.Занабазарын нэрэмжит Дүрслэх урлагийн музейн захирал, урлаг судлалын ухааны доктор П.Байгалмаа болон музейн эрдэм шинжилгээний ажилтнууд боловсруулжээ.