Нидерландын төв банк дэлхийн улс төрийн нөхцөл байдал тогтворгүй байгаа энэ үед “хямралын бэлэн байдлыг” хангах зорилгоор алтны нөөцийнхөө олон тэрбум ам.долларын үнэлгээтэй хэсгийг Хойд Америкаас гаргасан тухайгаа лхагва гарагт мэдэгдлээ.
Тус банк гуравдугаар сараас наймдугаар сарын хооронд Нью-Йорк болон Канадын Оттава хотод хадгалагдаж байсан нийт 345 орчим тонн алтнаас 94.8 тонн орчим алтыг Лондон руу шилжүүлсэн байна.
Шилжүүлэг хийхээс өмнө Нидерландын алтны нөөцийн 31.3 хувь нь Нью-Йоркт, 19.7 хувь нь Оттавад хадгалагдаж байжээ. Харин шилжүүлгийн дараа хоёр хотод хадгалагдаж буй алтны хэмжээ тус бүр 18.5 хувь болсон гэж банк мэдээлсэн байна.
Тус банк нийтдээ 675 тонн алтны нөөцтэй бөгөөд 2025 оны эцсийн байдлаар уг нөөцийн үнэ 72.2 тэрбум евро буюу ойролцоогоор 83.6 тэрбум ам.долларт хүрчээ.
Нидерландын төв банкны ерөнхийлөгч Олаф Слейпен бичгээр гаргасан мэдэгдэлдээ “Энэхүү шилжүүлгээр бид алтны нөөцийнхөө арилжаалах боломжийг сайжрууллаа. Бид алтны нөөцөө хэзээ ч ашиглах шаардлага гарахгүй гэж найдаж байгаа ч тэсвэртэй байдал болон аливаа нөхцөл байдалд бэлэн байх чадвараа бэхжүүлэх шаардлагатай” гэжээ.
Төв банкны мэдээлснээр АНУ болон Канадаас 30 тонноос дээш хэмжээний алтыг биет байдлаар Нидерландын төв хэсгийн Зейст хотын ойролцоох цэргийн баазад байрлах, өндөр хамгаалалттай агуулах руу шилжүүлжээ.
Гэхдээ алтны гулдмайнуудыг Атлантын далайг хэрхэн дамжуулан тээвэрлэсэн талаар тодорхой мэдээлэл өгөөгүй юм. Үүнтэй ойролцоо хэмжээний алтыг Зейстээс Лондон руу мөн шилжүүлжээ.
Үлдсэн шилжүүлгийг өөр аргаар хийн Нью-Йоркт байсан ойролцоогоор 65 тонн алтыг зарж, олсон хөрөнгөөрөө Лондон дахь зах зээлээс алт худалдан авсан аж.
Нидерландын төв банк Английн банканд хадгалагдаж буй алт нь орчин үеийн олон улсын худалдааны стандартыг хангадаг, дэлхийн хэмжээнд хамгийн хялбар арилжаалагддаг алтны нөөцөд тооцогддог гэж мэдэгджээ.
Тиймээс хямралын нөхцөл байдал үүсвэл Английн банкинд хадгалагдаж буй алт хамгийн түргэн шуурхай ашиглагдах боломжтой. Харин Нью-Йорк болон Оттавад хадгалагдаж буй алтны нөөцийг ийм нөхцөлд шууд, хурдан ашиглах боломж харьцангуй бага гэж Нидерландын төв банк тайлбарласан байна.
