Монгол Улсад энэ долоо хоног үйл явдал, гэнэтийн зүйлсээр дүүрэн өнгөрч байна. Эдгээр үйл явдлуудыг тоймлон хүргэе.
Төрийн гурван өндөрлөг гурвуулаа гадаадад томилолттой, бас гадаадын зочин хүлээн авсан завгүй өдрүүд байв. Ерөнхийлөгч У.Хүрэлсүх БНХАУ-д болсон Шанхайн хамтын ажиллагааны байгууллагын уулзалтад оролцлоо. Мөн чөлөөллөх дайны ялалтын 80 жилийн ойн арга хэмжээнд оролцсон юм. Энэ үеэр Монгол, БНХАУ, ОХУ-ын төрийн тэргүүн нарын ээлжит уулзалт болов. Уг уулзалтын үеэр талууд Монгол, Хятад, Оросын “Эдийн засгийн коридор байгуулах хөтөлбөр”-ийг дахин таван жилээр буюу 2031 он хүртэл сунгаж, ОХУ-аас Монгол Улсын газар нутгаар дамжуулан БНХАУ-д байгалийн хий нийлүүлэх хоолой барих төслийг хэрэгжүүлэхээр эцэслэн тохиролцов.
Ерөнхий сайд Г.Занданшатар ОХУ-ын Владивосток хотноо болсон Дорнын эдийн засгийн аравдугаар чуулга уулзалтад оролцлоо. Энэ үеэр ОХУ-ын Ерөнхийлөгч В.Путинд бараалхав. Ерөнхий сайд "100-150 мянган тонн улаанбуудай хөнгөлөлттэй үнээр нийлүүлэх саналыг Оросын талд тавьсан юм. Ерөнхийлөгч В.Путин Ерөнхий сайдын хүсэлтийг хүлээн авч шийдвэрлэхээ илэрхийллээ.
УИХ-ын дарга Д.Амарбаясгалан Бүгд найрамдах Казахстан улсын парламентын Мажилисийн дарга Е.Кошановын урилгаар тус улсад албан ёсоор айлчилж байна. Энэхүү айлчлалын үеэр бүс нутаг болон олон улсын тавцан дахь хамтын ажиллагааг бэхжүүлэх, зам тээврийн салбарт тулгадаж буй саад бэрхшээлийг шийдвэрлэх, шинэ маршрут бий болгох, шууд нислэгийн давтамжийг нэмэгдүүлж, тогтмолжуулах боломжит шийдэл зэрэг асуудлыг хөндлөө.
Ийнхүү манай улсын төрийн гурван өндөрлөг гадаадад томилолттой байснаас гадна гадаадын зочдыг хүлээн авсан өдрүүд байв. Шинэ Зеланд улсын парламентын Төлөөлөгчдийн танхимын дарга Жерард Браунли Монгол Улсад айлчиллаа. Айлчлалын хүрээнд Монгол Улсын Хүнс, хөдөө аж ахуй, хөнгөн үйлдвэрийн яам Шинэ Зеландын хонины ноосыг эрчимтэй хяргах орчин үеийн техник, технологийг Монгол Улсад нэвтрүүлж, малчдын амьдрал ахуйд бодит хувь нэмэр оруулж буй “Шейр Монголиа” ашгийн бус байгууллагатай харилцан ойлголцлын санамж бичиг байгуулав.
Монголд ирсэн дараагийн зочин нь Австралийн холбооны улсын Амбан захирагч Саманта Мостин байлаа. Айлчлалын үеэр харилцаа, хамтын ажиллагаа 2007 оноос хойш “Өргөтгөсөн түншлэл”-ийн хүрээнд хөгжиж ирснийг талууд сайшааж, ойрын хугацаанд харилцааны түвшнийг шат ахиулан “Иж бүрэн түншлэл”-ийн түвшинд хүргэхээ нотоллоо.
Хичээлийн шинэ жил даваа гаригтай давхцан эхэллээ. Энэ хичээлийн жилд боловсролын бүх шатны 2450 гаруй байгууллагад нэг сая 29 мянга орчим хүүхэд, залуус суралцаж эхлэв. ЕБС-д суралцах хүүхдийн тоо гэхэд 2025 оны байдлаар 797 мянга 830 мянга болж, өнгөрсөн жилийнхээс 30 гаруй мянгаар нэмэгдлээ. Ийнхүү сүүлийн жилүүдэд элсэлт, төгсөлтийн зөрүүний улмаас ЕБС-д суралцах хүүхдийн тоо улсын хэмжээнд жил бүр 20-30 мянгаар нэмэгдсээр байна. Үүнтэй холбоотойгорр сургуулийн хүрэлцээгүй байдал үргэлжилсэн хэвээр. Нийслэлийн зарим сургуулийн хичээлийн байр хүрэлцэхгүй сурагчид нэг ширээнд гурвуулаа сууж хичээллэж байна.
Хөвсгөл аймгийн Цагаан-Уул суманд энэ сарын 03-нд тарваган тахал бүртгэгдэв. Тахлын халдвар авсан өвчтөн аймгийн Нэгдсэн эмнэлэгт хэвтэн эмчлүүлж байгаа бөгөөд биеийн байдал нь маш хүнд байгаа аж. Тарваган тахал өвчин бүртгэгдсэнтэйгээр холбоотойгоор Цагаан-Уул болон Мөрөн сумдад хөл хорио тогтоож хавьтал судлалын үйл ажиллагааг эрчимжүүлэв. Одоогийн байдлаар нэгдүгээр хавьтал болох 64 хүнийг тогтоож, 42 хүнийг аймгийн нэгдсэн эмнэлгийн халдвартын тасагт тусгаарласан. Мөн 20 хүнийг гэрээр тусгаарлажээ.
Орхон аймгийн Баян-Өндөр сумын 220 кв-ын дэд станцын хаалттай хуваарилах байгууламжид гал гарч, тус станцаас хангагддаг найман аймаг, 143 суманд цахилгаан тасалдав. Галын унтрааж, шуурхай бригад нэг цагийн дотор гэмтлийг засварласан юм. Ингэснээр цахилгаан тасарсан Орхон, Булган, Хөвсгөл, Архангай, Өвөрхангай, Баянхонгор, Завхан, Говь-Алтай аймаг, эдгээр аймгуудыы 143 сумын эрчим хүчийг хэвийг болгов. Харин одоо галын шалтгааныг тодруулахаар ажиллаж байна.
