Куба улсад нэг долоо хоногийн дотор хоёр дахь удаагаа, харин оны эхнээс хойш дөрөв дэх удаагаа улс даяар цахилгаан тасарлаа. Хүйтэн дайны үеийн тоног төхөөрөмж зонхилдог Кубын эрчим хүчний сүлжээ бүхэлдээ хуучирч муудсан. Гэтэл АНУ-ын Ерөнхийлөгч Дональд Трамп Кубын эсрэг газрын тосны хатуу хориг тогтоосноос хойш нөхцөл байдал улам дорджээ.
АНУ-ын засаг захиргаа 1 дүгээр сард Кубыг "онцгой аюул занал" гэж зарлан, тус аралд түлш нийлүүлсэн аль ч улсад өндөр татвар ногдуулахаар сүрдүүлсэн юм. Үүнээс хойш Венесуэлийн нийлүүлэлт зогсож, Кубад ердөө ганцхан удаа Оросын танкер хүрчээ. Хэрэглээнийхээ 60 хувийг импортоор авдаг Кубын хувьд энэ нь хүнд цохилт болж байна.
НҮБ-аас энэхүү хориг арга хэмжээ нь Кубын эмзэг бүлгийнхэнд шууд хохирол учруулж, эм тарианы хомсдол үүсгэж байгааг анхааруулсан бол АНУ-ын тал үүнийг Кубын засгийн газрын буруу менежменттэй холбон тайлбарлаж байна. Одоогоор Куба улс Хятадын тусламжтайгаар нарны эрчим хүч рүү шилжих үйл явцыг түргэсгэхийг хичээж байна.
