Монголын банкны холбооноос "Банкны салбарын 2021 оны жилийн эцсийн тойм" судалгааг өнөөдөр танилцууллаа. Ерөнхийд нь дүгнэвэл банкны салбарын үзүүлэлт харьцангуй тогтвортой, өсөлттэй жил болжээ. Банкны холбооны гүйцэтгэх захирал Л.Амар "Банкны салбарын нийт актив 2.3 хувиар нэмэгдэж, 41 их наяд төгрөгт хүрсэн. Гэвч санхүүгийн зах зээлд тодорхой бус байдал, эрсдэл улам хуримтлагдаж байна. Сүүлийн хоёр жил гаруй хугацаанд мөнгөний болон сангийн тэлэх бодлогын хүрээнд ААН-үүдэд хөнгөлөлттэй зээлүүд олгож эхэлсэн. Зээлийн хуваарьтаа өөрчлөлт оруулсан иргэд, ААН-үүд, хөтөлбөрийн зээл авсан ААН-үүд 2022 онд зээлээ төлж эхлэх бөгөөд энэ нь зээлийн чанарт сөргөөр нөлөөлөх эрсдэлтэй байна. Төрийн зээлийн авлагыг барагдуулдаг механизм ялзарсан байдалтай байна” гэж танилцуулгын үеэр онцоллоо. Мөн зээлийн хүү буурч түүхэн доод түвшиндээ очсон бөгөөд банкны шинээр олгосон зээлийн хэмжээ жилийн 6 хувиар буурчээ. 2021 онд зөвхөн уул уурхай болон хөдөө аж ахуйн салбарын зээл олголт нэмэгдсэн байна. Уул уурхай, хөдөө аж ахуйгаас бусад салбаруудын зээл олголт бууралттай байна. Иргэдийн зээлийн хувьд автомашины зээл огцом буурсныг мөн онцоллоо.
2021 оны банкны салбарын онцлох өөрчлөлт, цаашдын хандлага