XVII жарны "Сайжруулагч" хэмээх усан барс жилд Монгол түмэндээ хүндлэгдсэн олон эрхмийн мэндэлсний тэгш ой тохиож байна. Хөдөлмөрийн баатар, Монголын балетын урлагийг үндэслэгч Б.Жамъяндагва, Ардын уран зохиолч, соёлын гавьяат зүтгэлтэн, “Болор цом”-ын эзэн яруу найрагч, туульч Т.Галсаны мэндэлсний 90 нас, Монгол Улсын анхны Ерөнхийлөгч П.Очирбат, ард түмний хайртай ардын дууч П.Адарсүрэнгийн мэндэлсний 80 нас, Монгол Улсын Хөдөлмөрийн баатар, “Чингис хаан” одонт, Төрийн шагналт, урлагийн гавьяат зүтгэлтэн, хөгжмийн нэрт зохиолч Б.Шарав, БНМАУ-ын ардын жүжигчин, ХХ зууны манлай балетчин Ю.Оюун, ардын жүжигчин, Морин хуурын чуулгын үүсгэн байгуулагч Ц.Батчулууны мэндэлсний 70 насны ой тохиож байна. Мөн МоАХ-ны анхны ерөнхий зохицуулагч, ардчиллын алтан хараацайн нэг С.Зоригийн мэндэлсний 60 насны ой тохиож байна.

Монголын балетын эцэг 90 нас хүрэх байлаа

Хөдөлмөрийн баатар, Төрийн шагналт, ардын жүжигчин, урлагийн гавьяат зүтгэлтэн, Монголын балетын урлагийг үндэслэгч, нэрт сурган хүмүүжүүлэгч, багш Б.Жамъяндагвын 90 насны ой энэ жил тохионо. Тэрбээр 1932 оны намар Завхан аймгийн Тэлмэн сумын нутагт төржээ. Тэрбээр 1946-1954 оны офицерын сургууль, 1957-1962 онд ЗХУ (ОХУ)-ын Москва хотын А.В.Луначарскийн нэрэмжит Театр урлагийн дээд сургуулийг найруулагч, балетмейстер мэргэжлээр суралцан төгссөн юм. Түүний амьдралын ихэнх хугацаа Монголын балетын урлагтай салшгүй холбоотой байсан бөгөөд 1962 онд сургууль төгсөж ирснээсээ хойш хагас зуу гаруй жил Улсын дуурь бүжгийн театрын уран бүтээлтэй холбоотой байж олон сонгодог болон үндэсний, орчин үеийн балетын жүжгүүдийг тавьсан юм.

“Шехеразада”, “Цэнхэр нүдэн бүсгүй”, “Эсмеральда”, “Дон Кихот”, “Ай Ёо Доктор”, “Спартак”, “Хунт нуур” зэрэг дэлхийн сонгодог балетын жүжгүүд, “Шарилжан дундах цэцэг”, “Хошуу наадам”, “Мөнхийн нөхөрлөл”, “Нуурын домог”, “Найз залуус”, “Анчин ба согоо”, “Хөгжмийн эгшиг”, “Уран хас”, “Мөнгөн залаа”, “Эрдэнэсийн уулс”, “Үйлийн гурван толгой”, “Малчдын дуулал”, “Бөртэ чоно”, “Энхийн тойрог” зэрэг үндэсний болон орчин үеийн балетын жүжгүүдийг тавьсан нь Монголын сонгодог урлагийн, балетын урлагийн урын санд мөнхөд орших хосгүй бүтээлүүд болон хадгалагдаж мөн туурвигдсаар байгаа билээ.

Тэр бол балетмейстер уран бүтээлч төдийгүй чадварлаг зохион байгуулагч, найруулагч хүн. 1970-1990-ээд онд зохион байгуулагдаж байсан төр засгийн болон ой, олон улсын олон тооны арга хэмжээнд зориулсан концертуудыг найруулан зохион байгуулж байв. 1981 онд Москва хотноо зохион байгуулагдсан Олон улсын балетын уралдаанд орчин үеийн бүжгийн дэглэлтээр тэргүүн байрыг түүнд олгосон нь Б.Жамъяндагваын авьяас чадварыг зөвхөн Монголд төдийгүй гадаад улс орнуудад хүндэтгэн хүлээн зөвшөөрч байсны нэг тод жишээ болно.

Монголын балетын урлагийн нэрт зүтгэлтэн, балетмейстер, найруулагч Б.Жамъяндагвын уран бүтээл, хөдөлмөр зүтгэлийг нь төр засгаас өндөр үнэлж 1973 онд урлагийн гавьяат зүтгэлтэн, 1976 онд “Алтан гадас” одон, 1991 онд Төрийн шагнал, 2003 онд ардын жүжигчин цол, 2008 онд “Хөдөлмөрийн баатар” цолоор тус тус шагнагджээ. Монголын сонгодог балетын урлагийг үндэслэгч тэрбээр амьдралынхаа эцсийн мөч хүртэл ягаан театртаа ажиллаж 2021 оны арваннэгдүгээр сарын 11-нд тэнгэрийн орноо одсон юм.

Ардын уран зохиолч Т.Галсаны 90 насны ой тохиож байна

Ардын уран зохиолч, соёлын гавьяат зүтгэлтэн, “Болор цом”-ын эзэн яруу найрагч, туульч Т.Галсаны мэндэлсний 90 насны ой энэ онд тохиож байна. Тэрбээр 1932 оны хаврын тэргүүн сарын шинийн есөнд Цэцэрлэг Мандал аймгийн Чандмань уулын хошуу (өнөөгийн Баянхонгор аймгийн Заг гол сумын нутаг) Бумбатад хэмээх газар малчин Тангадынд мэндэлсэн аж. Т.Галсан МУИС-ийн хэл уран зохиолын ангийг төгсөөд Баянхонгор аймгийн төвийн арван жилийн сургуульд багш, хичээлийн эрхлэгчээр ажиллаж байв. Энэ үед буюу 1960 оны эхээр үзэл сурталд харш, эсэргүү зохиол бичсэн хэмээн зохиол бүтээл нь хаагдаж “Эсэргүү” нэр зүүн цөлөгдсөн ганц зохиолч. Ингээд тэмээчин, ямаачин, тууварчин, мужааны ажил хийж байгаад 1970 оноос мах комбинатад ясчин, хөргөх цехийн мастер, АПУ-д ачигч, МЗЭ-ийн хорооны дэргэдэх Нацагдоржийн музейд манаач, улмаар “Монгол кино” үйлдвэрт туслах ажилчин, Баримтат киноны ерөнхий редактор, зургийн дарга, эдийн засагч, 1986 оноос АБЯ-ны сонин сэтгүүлийн нэгдсэн цэцэд хариуцлагатай нарийн бичгийн даргаар ажиллажээ.

Тэрбээр Монгол хэл бичгийн дээд сургууль, Хэл иргэншлийн дээд сургуулийг санаачлан байгуулагчдын нэгэн бөгөөд 1992 оноос дээрхи дээд сургуулиудад багшлан, бүтээлээ туурвисаар явна. Анхны шүлгээ 1947 онд бичиж уран бүтээл нь 1950-иад оноос төв, хөдөөгийн сонинд хэвлэгдсээр 1962 онд “Төрсөн хүүгийн тань үг” анхны түүврээ хэвлүүлсэн. Гэвч уг ном гурван жилийн дараа хураагдаж улмаар шатаагдсан байна. Шатаалгадаг түүврээс 10 жилийн дараа хэвлэгдсэн “Өнөр хүний зүрх” ном нь түүнийг Монгол яруу найргийн гэр бүлд дахин багтаав. Тэрбээр 1990 оны ардчилсан хувьсгалд ард олныг оюун санааны талаар бэлдэхэд онцгой үүрэг гүйцэтгэсэн “Өр”, “Сталины хөшөө” зэрэг “эсэргүү” шүлгүүдээ “Монголын дуу хоолой” сонинд нийтлүүлснээрээ Д.Нацагдоржийн нэрэмжит шагнал хүртсэн ажээ.

Түүний анхны шүлэг 1949 онд ”Пионерын үнэн” сонинд нийтлэгдсэнээс хойш уран бүтээлийн олз омгоор дүүрэн, уран бүтээлийн эрэл хайгуулын жилүүд урсан үргэлжилсээр байна. Монгол кино үйлдвэрт 18 жил ажиллахдаа хэдэн зуун кино мэдээний тайлбар бичиж, 50 гаруй баримтат кино бүтээлцэж, “Эхлэл”, “Дэгдээхэй нас”, “Мөнгөн буйл”, “Уяа” уран сайхны киноны зохиол бичжээ. Мөн цэцэрлэг, бүх шатны сургуульд үзэх 280 диафильм бүтээж, “Монгол кино” үйлдвэрийн 40 жилийн ойд зориулж “Өндөг” хэмээх Монголын анхны зурган кино “мультфильм” бүтээл гаргажээ. Монгол бичгийн талаар олсон амжилтаа бататган, ахиулах, хэл соёлоо хамгаалах талаар Т.Галсан уйгагүй зүтгэл гарган тэмцсэнийг ард түмэн мэдэх билээ.

Анхны Ерөнхийлөгч 80 нас хүрлээ

Монгол Улсын анхны ерөнхийлөгч П.Очирбат энэ жил 80 нас хүрч байна. Тэрбээр 1942 оны 1 дүгээр сарын 23-нд Завхан аймгийн Түдэвтэй сумын Бунхантын хэмээх газрын өвөлжөөнд төржээ. Түүний хувьд 1990 оны 9 дүгээр сараас 1992 оны 2 дугаар сар хүртэлх хугацаанд БНМАУ-ын Ерөнхийлөгч, 1992-1997 онд Монгол Улсын Ерөнхийлөгчөөр ажиллаж байсан билээ. Монгол Улсын хөгжлийн шинэ сонголтын үед АИХ-ын Тэргүүлэгчдийн дарга, Монгол Улсын Ерөнхийлөгчөөр сонгогдон хүчин зүтгэхдээ Монгол Улсын шинэ Үндсэн хуулийг (1992) боловсруулан батлуулах, уг хуулийн дагуу бүх ард түмнээр сонгогдсон анхны Ерөнхийлөгч болж, тус улсад эрх зүйт төр, ардчиллыг бэхжүүлэх, зах зээлийн эдийн засагт шилжих, гадаад бодлогыг нээлттэй болгох талаар их зүйл хийсэн билээ.

Тэрбээр “Монгол Улсын хөгжлийн үзэл баримтлал” боловсруулж, богино хугацааны дотор АНУ-ын хоёр Ерөнхийлөгчтэй гурван ч удаа уулзаж, Монгол, Америкийн харилцааны зарчмыг дэлхий нийтэд зарлан, ОХУ, БНХАУ-тай найрсаг хамтын ажиллагааны гэрээ байгуулсан байна. Мөн түүний хувьд техникийн ухааны доктор (Sc.D), профессор, академич юм. Тэрбээр Монгол Улсын төрийн тэргүүн дээд шагнал "Чингис хаан" одонг хүртсэн анхны төрийн зүтгэлтэн болсон юм.

Ард түмний хайртай Адараагийн 80 насны ой

Монголын ард түмний зүрх сэтгэлд дуу хоолойгоороо мөнхрөн үлдсэн ардын дууны П.Адарсүрэнгийн мэндэлсний 80 насны ой тохиож байна. Тэрбээр 1942 оны гуравдугаар сарын 1-нд Завхан аймгийн Цагаанхайрхан сумын нутагт “Хярын зуслан” гэдэг газар мэндэлжээ. 1971 онд Ардын хувьсгалын 50 жилийн ойг угтсан Бүх ард түмний урлагийн үзлэгээс шалгарч медальт байранд шалгарсан нь түүний амьдралын хувь заяаг эргүүлжээ. Энэ цагаас хойш тэрбээр Ардын дуу бүжгийн чуулгад гоцлол дуучнаар ажиллаж эхэлсэн түүхтэй. Тэр анх дөрвөн ятгатайгаар монгол ардын дуу “Хадат ухаа”, “Малчнаараа торойно”, “Дөрвөн улирлын өнгө” дууг дуулдаг байжээ. Ардын дуу бүжгийн чуулгын төлөвлөгөөг 10 гаруй жил давуулан биелүүлэхэд П.Адарсүрэн томоохон үүрэг гүйцэтгэж байсан бөгөөд түүний оролцсон тоглолт суух сандалгүй болж, үзэгчид тайзнаас буулгахыг хүсдэггүй байлаа. Монголын радиогийн “Малчин” нэвтрүүлгийн сурвалжлагч, яруу найрагч Ц.Чимэддорж “П.Адарсүрэн агсан дуулж эхэлсэн цагаасаа болих хүртлээ дуулсан 300 гаруй уран бүтээл нь ард түмний сэтгэлд хүрсэн” хэмээн тэмдэглэн үлдээжээ. Бурханаас заяасан эгэлгүй авьяастай ч төрдөө үнсүүлж чадаагүй энэ эрхэм 1998 оны аравдугаар сарын 19-нд тэнгэртээ дэвшсэн юм.

“Сэрсэн тал”, “Сэтгэлийн эгшиг” үлдсэн ч тэр өөрөө үгүй гурван намар

Монгол Улсын Хөдөлмөрийн баатар, “Чингис хаан” одонт, Төрийн шагналт, урлагийн гавьяат зүтгэлтэн, хөгжмийн нэрт зохиолч Б.Шаравын мэндэлсний 70 насны ой энэ онд тохионо. Нэрт хөгжмийн зохиолч одоогоос 70 жилийн өмнө 1952 оны 11 дүгээр сарын 13-нд Хэнтий аймгийн Жаргалтхаан сумын нутагт мэндэлжээ. Тэрбээр 1972 оноос уран бүтээлээ нийтийн дуугаар эхэлсэн. Түүний гол бүтээлүүдэд “Чингис хаан” дуурь, I, II, III симфони, “Ононд хатаагдсан илд”, “Алтан ураг”, “Зуурдын орон”, “Сэрүүн намар” зэрэг үндэсний болон модерн балетууд, үндэсний хөгжимд зориулсан нийт таван концерт, флейт найрал хөгжмийн, төгөлдөр хуур найрал хөгжмийн концерт, “Замбуу тивийн наран” магтуу, “Сэрсэн тал”, “Тэнгэрийн орон” удиртгал, “Үлэмжийн ертөнц”, “Хэрлэнгийн домог”, “Зохиомж” зэрэг симфони уран сэтгэмж, “Ард Аюуш”, “Байлдааны даалгавар”, “Мартагдсан дууль”, “Илүү сартай зун”, “Хүсэл” зэрэг 30 гаруй киноны хөгжим, дан хөгжмийн жижиг хэлбэрийн 70 гаруй бүтээлүүд, төгөлдөр хуурын болон мэргэжлийн дуулаачдад зориулсан ардын дууны найруулгууд, 22 романс, “Монголын тал нутаг”, “Аав ээж хоёр”, “Цэнхэрийн голоор нутаг минь”, “Хайрхан уулын бараа”, “Очоод золгоно доо”, “Зүрхний хайртай эх орон” зэрэг нийтийн 300 гаруй дуу, хүүхдийн дуу, найрал дуу, радио телевизийн чимэглэл хөгжим зэрэг олон арван бүтээлүүд багтана.

Б.Шаравын бүтээлүүд ОХУ, БНХАУ, АНУ, Япон, Франц, Герман зэрэг гадаадын олон орнуудын нэр хүндтэй тайзнаа эгшиглэж, Монголын хөгжмийн урлагийг олон улсад түгээн дэлгэрүүлэхэд үнэтэй хувь нэмэр оруулсан билээ. Түүний алдарт бүтээл “Хэрлэнгийн домог” нь 2005 онд Стокгольм хотын концертын их танхимд Нобелийн шагнал гардуулах ёслолын арга хэмжээнд тоглогдсон нь орчин цагийн Монголын мэргэжлийн хөгжмийн урлагийг дэлхий дахинаа таниулсан онцгой үйл явдал болсон юм. Б.Шарав 1985 онд “Замбуу тивийн наран” магтуугаар “Азийн хөгжмийн VII индэр” симпозиумын шилдэг бүтээлийн шагнал, 1988 онд II симфониор ЗХУ-ын Ленинград хотноо болсон Энх тайвны төлөө хөгжмийн наадмын шилдэг бүтээлийн шагнал, 1990 онд Монголын хөгжмийн зохиолчдын эвлэлийн шагналыг тус тус хүртжээ. Монголын хөгжмийн урлагийг хөгжүүлэхэд оруулсан түүний хөдөлмөр бүтээлийг төр, засгаас өндрөөр үнэлж “Сэрсэн тал”, “II симфони” бүтээлүүдэд нь 1992 онд Монгол Улсын Төрийн шагнал, 2002 онд Урлагийн гавьяат зүтгэлтэн цол, 2006 онд Монгол Улсын төрийн дээд шагнал-тэргүүн зэргийн одон “Чингис хаан” одон, 2019 онд Монгол Улсын Хөдөлмөрийн баатар цол тус тус хүртээжээ. Төрдөө үнэлэгдэж, түмэндээ хүндлэгдсэн эрхэм хөгжмийн зохиолч 2019 оны 7 дугаар сарын 15-ны өдөр хүнд өвчний улмаас таалал төгсөж Монголын ард түмэн, хөгжмийн урлагт нөхөж баршгүй гарз тохиосон билээ. Тэр л ганц “Сэрсэн тал”-ыг сэтгэлд буулгаж, “Сэтгэлийн эгшиг”-ээр гуниг нимгэлж, олдошгүй эрдэнэ “Аав, ээж хоёр-ыг орлож, “Гэгээн алсад одох юмсан”-аараа амар амгаланг өгч, “Монголын тал нутаг”-аараа эх орноороо хайрлах, бахархахыг бидэнд үлдээсэн билээ.

Монголын анхны хун, зууны манлай балетчин Ю.Оюуны мэндэлсний 70 насны ой

БНМАУ-ын ардын жүжигчин, хорьдугаар зууны манлай балетчин Ю.Оюуны мэндэлсний 70 насны ой энэ онд тохиож байна. Тэрбээр 1952 онд Улаанбаатар хотноо мэндэлжээ. Монголын анхны хун гэсэн хүндтэй нэрийг авсан балетчин Ю.Оюун 1964 онд ЗХУ-д бүжгийн сургуульд элсэн суралцаж, Дэлхийн балетын өлгий болсон Санкт-Петербург хотын А.Я.Вагановагийн нэрэмжит балетын сургуулийг 1972 онд “Онц” дүнтэй дүүргэж, Дуурь бүжгийн эрдмийн театрт хуваарилагдан ирсэн юм. Тэрбээр 1973 онд Төрийн шагналт, ардын жүжигчин Ж.Чулууны “Уран хас”-ын Хандармаа, 1974 онд Л.Минкус “Кихот ноён” балетын гол дүр Китрид бүжиглэж чадалтай балетчин гэдгээ анх удаа үнэлүүлсэн гэдэг. 1990-ээд оныг хүртэл бүжигчнээр ажиллахдаа 25 бүжгэн жүжгийн гол дүрийг бүтээжээ. Төрийн болон ойн хүндэтгэлийн концертуудад 40 гаруй удаа оролцож өөрийн тайзнаа Болгарын И.Дрангажав, ОХУ-ын алдарт бүжигчин М.Лиепа, Швейцарийн Х.Мейстер нартай "Хунт нуур", "Дон Кихот", "Жизель" бүжгийн жүжгүүдэд гоцлон тоглож, Москва, Санкт-Петербург, Львов, Новосибирск, Будапешт, Кабул, Тбилиси, Ереван, Ханой, Улан-Үдэ, Бээжин, Хөх хотуудад айлчлан тоглосон. 1974 онд Варна, 1977, 1981 онд Москва, 1978, 1980 онд Японд болсон Олон улсын тэмцээнүүдэд амжилттай оролцож, гурван хүрэл медаль хүртэж, 1990 онд Токиод болсон А.Павловагийн дурсгалд зориулсан гала концертод урилгаар оролцож, 1993 онд Москвагийн олон улсын тэмцээнд хүндэт зочноор уригдаж байжээ. “Соёлын яамны тэргүүний уран бүтээл” шагналаар 1975, 1979, 1982, 1984 онуудад, Монгол, Вьетнам улсын “Соёлын тэргүүний ажилтан”, 1976 онд “Засгийн газрын хүндэт жуух”, 1978 онд БНМАУ-ын гавьяат жүжигчин, 1986 онд БНМАУ-ын ардын жүжигчин цол тэмдгээр шагнуулсан билээ. Тэрбээр хүнд өвчний улмаас 2000 онд таалал төгссөн билээ.

Морин хуурын чуулгыг үндэслэгч Ц.Батчулуун эрхмийн 70 насны ой

Ардын жүжигчин, Морин хуурын чуулгын үүсгэн байгуулагч, Соёл, урлагийн их сургуулийн хүндэт профессор Ц.Батчулууны мэндэлсний 70 насны ой тохиож байна. Тэрбээр 1952 оны 4 дүгээр сарын 18-нд Улаанбаатар хотод төрж, 1971 онд Хөгжим бүжгийн дунд сургуульд их хуурч Г.Жамъянгийн удирдлага дор суралцан орчин цагийн мэргэжлийн анхны хуурчдын нэг болсон түүхтэй. Монгол үндэсний урт, богино дуу, дэлхийн болон шинэ цагийн үндэсний хөгжмийн зохиолчдын морин хуур найрал хөгжимд зориулсан олон арван бүтээлийг гоцлон хөгжимдөж, Монголын үндэсний олон нийтийн  радиогийн Алтан сан хөмрөгт үлдээсэн гарамгай хуурч юм. Ц.Батчулуун нь 1971 оноос өнөөг хүртэл мэргэжлийн урлагийн байгууллагад олон жил үр бүтээлтэй ажиллаж, Монгол үндэсний морин хуур хөгжмийг дэлхий дахинаа таниулах, ЮНЕСКО-гийн хүн төрөлхтний соёлын биет бус өвийн шилдэг дээжсээр бүртгүүлэхэд онцгой үүрэг гүйцэтгэсэн, үндэсний болон гадаад орны 100 гаруй хуурчдыг сурган мэргэшүүлж, морин хуурын өвлөн уламжлуулах үйлсэд томоохон хувь нэмрээ оруулсан алдарт багш юм.

Тэрбээр 1992 онд Морин хуурын чуулгыг үүсгэн байгуулж, морин хуурыг монгол гэрийн хоймроос, дэлхийн улс түмэн, НҮБ-ын өндөр тайзнаа эгшиглүүлсэн урлагийн зүтгэлтэн байлаа. Монгол Улсын төр алдарт хуурчийн авьяас зүтгэлийг өндрөөр үнэлж, 2002 онд Монгол Улсын ардын жүжигчин цол хүртээсэн. Түүний үйлсийг хилийн чанадад ч  хүлээн зөвшөөрч Азийн хөгжмийн соёлд  оруулсан онцгой хувь нэмэр хэмээн тэмдэглэж Япон Улсын Эзэн хааны зарлигаар, “Мандах нар” одонгийн Сарнай цэцгийн хэлбэрт товч бүхий ”Нарны алтан уяа” одонгоор шагнаж байжээ. Монголчууд бидний оюун сэтгэл, оршин тогтнохын эгшгэн дуулал болсон морин хуурынхаа төлөө насан туршдаа зүтгэж явсан Ц.Батчулуун 2015 оны 2 дугаар сарын 7-ны өдөр өвчний улмаас таалал төгсөж, урлагийн салбарт хүнд гарз тохиосон билээ.

Ардчиллын алтан хараацайн 60 нас

МоАХ-ны анхны ерөнхий зохицуулагч, Монголын ард түмний сод хүү, нэрт улс төрч, Ардчилсан хувьсгалын алтан хараацай С.Зориг хэрвээ амьд байсан бол 60 нас хүрэх байлаа. С.Зориг нь Монголын дээд боловсролын салбарын томоохон зүтгэлтнүүдийн нэг, МУИС-ийн декан, Боловсролын яамны орлогч сайдын албыг хашиж байсан Санжаасүрэнгийн хоёр дахь хүү болон 1962 оны 4 дүрээр сарын 20-нд Улаанбаатар хотод мэндэлжээ. Тэрбээр 1980 онд нийслэлийн 23-р дунд сургуулийг төгсч, 1985 онд Москвагийн улсын их сургуулийг философич мэргэжлээр дүүргэсэн. Монголын Ардчилсан холбоог \МоАХ\ ардчилсан хувьсгалыг тэргүүлэх хүчин болгож зохион байгуулах, коммунист дарангуйлалт нийгмийг цус урсгасан мөргөлдөөнгүйгээр ардчилсан хөгжлийн замд оруулахад улстөрч С.Зоригийн авьяас, тууштай чанар, итгэл үнэмшил түүхэн чухал үүрэг гүйцэтгэсэн билээ. Тэрээр 1992, 1996 оны сонгуулиар УИХ-д сонгогдож, Ардчилсан холбоо эвслийн хоёр дахь Засгийн газар болох Ц.Элбэгдоржийн Засгийн газарт Дэд бүтцийн сайдын албыг хашиж байв. Монголын үндэсний Ардчилсан нам\МҮАН\, Монголын Социал демократ намын\МСДН\ “Ардчилсан холбоо эвсэл” УИХ-ын сонгуульд ялаад хоёр жил болж байхад буюу 1998 оны намар УИХ-ын гишүүн, Дэд бүтцийн сайд С.Зориг гэртээ бусдад хорлогдон амиа алдсан юм. Гурав хоногийн дараа түүнтэй салах ёс гүйцэтгэхээр 30 мянган хүн цуглаж, эх орон даяар бүх нийтийн гашуудал зарлаж, Монголын ард түмэн хайрт хүүгийнхээ хойноос эмгэнэн гашуудаж байлаа. “Би монгол хүний саруул ухаанд итгэдэг” хэмээх түүний хэлсэн үг Монголын ард түмний сэтгэлд одоо ч бүлээн хэвээрээ оршдог.