Улсын хэмжээнд 25 сая мал төллөх урьдчилсан мэдээтэй байна. Хаваржилт хүндэрч болзошгүй байгаа тул төл малын хорогдлоос урьдчилан сэргийлэх үүднээс ХХААХҮЯ 50 гаруй ААН-тэй 120 мянган тонн тэжээлийг импортоор оруулж ирж нийлүүлэх гэрээ байгуулаад байна.

Өнгөрсөн сарын байдлаар улсын хэмжээнд 440 мянган толгой мал хорогдоод байгаагаас Баянхонгор аймагт 220 мянга гаруй буюу хамгийн их мал ногдож байна. Мөн  Архангай, Говь-Алтай, Өвөрхангай, Төв, Дундговь аймагт малын хорогдол их байгааг салбарын яамнаас мэдээлж байна. Малын зүй бус хорогдлын 63.1 хувийг эдгээр аймаг эзэлж байгаа юм. Үүнтэй холбоотойгоор малын сэг зэмийг устгаж ариутган халдваржүүлэх ажлыг хийх талаар албан тоотыг ХХААХҮЯ-наас аймгуудад хүргүүлжээ.