Хамгийн азтай...
2020 он коронавирусээр эхэлж бас төгсөж байна. Хүн төрөлтхний амьдралыг эгнэгт өөрчилж буй цар тахлын ид дэгдэлтийн үеэр түүнийг ялан дийлсэн настнуудын тухай уншихад таатай биш гэж үү.
Нью-Йоркийн 90 настай оршин суугч Анна Фортунато эмнэлгээс гарсныхаа дараа “Би тэсэж чадсан юм чинь та бүхэн ч гамшгийг даван гарч чадна” гэж хэлж байсан нь бидэнд итгэл найдвар өгч байлаа.
Шоколад, амтат жигнэмэггүйгээр нэг хоногийг ч өнгөрөөдөггүй 99 настай англи эмээ, Ром хотын 101 настай өвөө “синьор П”, Италика гэж нэрлэгдсэн Генуя хотын 102 настай Грондона, 104 насандаа аюулт тахлыг давж чадсан Рита Рейнолдс, Ухань хотын 100 настан, 104 насандаа ч коронавируст ялагдаагүй хоёрдугаар дайны ахмад дайчин америк өвөө Уильям Лэпшис гээд аюулт гамшгийг даван туулж чадсан өндөр настнууд бидний бахархал юм. Тэдний дотроос 101 настай итали эмээ Мария Орсингер коронавирусээр гурвантаа өвчилсөн ч эдгэрч чадсанаараа 2020 оны хамгийн азтай хүн боллоо.
Хамгийн дотно...
Японы шумбагч, "Токиогийн хөгшин хонин толгойт" гэгдэх губан загастай найзалсаар 30 дахь жилээ үдэж байна.
Хироюки Аракава 1980-аад оны сүүлчээр шархадсан махчин загасыг анх олж тэжээн тэнхрүүлжээ. Губан төрлийн энэ махчин загас хүнтэй төстэй том толгойтой. Туйлдсан загасыг тэжээсээр тэд дотно нөхөрлөж тэнгисийн зочинд "Йорико" гэсэн нэр хайрлажээ. Загас ч авралт найзаа мартсангүй. Өдгөө 79 нас хүрч байгаа Аракава найзтайгаа “бэлэгтэй” очиж уулздаг гэнэ. Загас түүнийг хараад баярлан тойрч бүр гар хүрч, үнсэхийг хүртэл зөвшөөрдөг ажээ.
Хамгийн ахмад сурагч...
90 настай кени эмээ өөрийн зургаан гуч, дөчийнхөө хамт бага сургуулийн сурагч болов.
Присцилла эмээ багшийнхаа яриаг маш анхааралтай чагнан амьтдын нэрийг англиар дэвтэртээ бичиж сууна. 65 жилийн турш эх баригчаар ажилласан эмээг сэтгүүлчид дэлхийн хамгийн өндөр настай сурагч гэж нэрлэжээ. Присцилла бага сургуульд суралцахаас гадна ангийнхандаа тусалж, тэдэнд эмийн ургамал тайлбарлаж таниулдаг гэнэ.
Хамгийн ихээр буурч байгаа...
Оросын Эрүүл мэндийн яамны мэдээгээр тус улсад согтуулах ундааны хэрэглээ эрс буурч байгаа ажээ. 2020 онд гэхэд л жилийн хэрэглээ дөрвөн литрээр буурч одоо нэг хүнд ноогдох алкоголын хэмжээ 14,3 литрээс 10,3 литр болжээ. Спиртийн ундааны татвар ба үнэ бүрдүүлэлт нь өөрчлөгдсөнөөс хэрэглээ ийнхүү буурчээ.
Хамгийн өнөр өтгөн...
Америкийн Иллинойс мужийн Лев ба Рут Зингерийн гэр бүл сайхан 100 дахь ачаа угтаж авлаа.
Тэд 53 ач, 46 гуцанцар, нэг дөчинцөртэй гэнэ. Хос хоёр өөрсдөө 12 хүүхдийн эцэг эх бөгөөд том нь 58-тай бол отгон нь 31 настай. Зингерийнхэн Зул сар эсвэл Улаан өндөгний баяраар цугларахдаа орон нутгийн сүмийн том танхмыг түрээсэлдэг гэнэ. "Хүүхдүүд том болж, тэдний хүүхдүүд төрж байна. Шинэ хүн төрөх нь хамгийн сайхан ид шид. Бидний удам 100 гарсан нь хамгийн сайхан баяр боллоо" гэж 79 настай Лев ярьжээ.
Хамгийн эцэг Чингис...
Франц, Британийн эрдэмтэдийн судалгаагаар орчин үеийн Азийн хүн амын гуравны нэг нь 11 хүнээс гаралтай гэж тогтоов. Тэд Азийн 121 бүсэд судалгаа хийгээд орчин үеийн хүмүүсийн элэнц хуланцын нэг нь Чингис хаан гэж үзжээ.
Хамгийн экологч...
Их Британийн 72 настай иргэн Мак Каски ганцхан гялгар уутаа 34 жилийн турш ашиглаж иржээ. Тэрбээр үүнийг экологийн шалтгаангаар зориуд туршиж үзсэн гэлээ. Каски энэ хугацаанд 2000 гаруй удаа дэлгүүрээр үйлчлүүлэхдээ нэг л уутаа ашигласан байна.
Хамгийн буянт үйлстэн
АНУ-ын Вашингтон мужийн Алекс гэдэг охин 2015 онд ертөнцийн мөнх бусыг үзүүлсэн эмээгийнхээ дурсгалыг хүндэтгэн жилдээ 60 удаа буяны арга хэмжээнд оролцдог гэнэ. Алекс энэ ажлыг таван жилийн турш гүйцэтгэж ээжийнхээ хамт бусдад хувцас хунар, хоол хүнс түгээн үйлчлэгч нарын гарыг цайлгаж, хүүхдүүдэд тоглоом тараадаг аж. Эмээ нь жаран насандаа өөд болсон тул охин жилдээ төдий хэмжээний буян үйлс бүтээхийг зорьдог ажээ.
Хамгийн үзэсгэлэнтэй...
Үйлдвэрийг үзэсгэлэнтэй гэж болох уу? Болохоор барахгүй энэ оны хамгийн үзэмжтэй үйлдвэрээр хоёр зууны настай дүпүний үйлдвэрийг нэрлэжээ. Хятадын Цайжай тосгоны энэ үйлдвэр зөвхөн дүпү үйлдвэрлээд зогсохгүй буурцгийн бусад бүтээгдэхүүн гарган бүсийнхээ дэлгүүрүүдэд нийлүүлдэг. Дизайнерууд үйлдвэрийн эртний төрхийг нь хадгалан үйлдвэрт технологийн шинэчлэлт хийсэн байна.
