Нийслэлийн Онцгой байдлын газраас гал түймрийн нөхцөл байдалтай холбоотой цаг үеийн асуудлаар мэдээлэл өглөө.
Гал түймэртэй тэмцэх хэлтсийн дарга, дэд хурандаа Ж.Хүдэрчулуун “Нийслэлийн хэмжээнд он гарсаар өнөөдрийн байдлаар 897 удаагийн гал түймрийн дуудлага бүртгэгдсэн. Гал түймрийг шалтгаан, нөхцөлөөр нь ангилбал ил галаас үүдэлтэй гал түймэр дийлэнх хувийг эзэлж байгаа бол цахилгаан ашиглалт, яндангийн цоонолтоос шалтгаалсан тохиолдлууд мөн бүртгэгдсэн.
Түүнчлэн он гарсаар нийслэлийн хэмжээнд шар өвсний 75 удаагийн дуудлага бүртгэгдсэн нь өнгөрсөн оны мөн үетэй харьцуулахад 67 хувиар буурсан үзүүлэлттэй байна. Гэвч иргэдийн хариуцлагагүй байдал өндөр хэвээр байна. Өнөөдрийн байдлаар нийслэлийн хэмжээнд ой, хээрийн хоёр удаагийн түймрийн дуудлага бүртгэгдсэн.
Мөн өнгөрсөн амралтын өдрүүдэд Богдхан уулын дугуй цагаан орчимд иргэд ил гал гаргасан тохиолдол бүртгэгдсэн. Ойн тухай хуульд зааснаар нэн хуурайшилтын аюултай үед ой, модонд ил гал гаргахыг хориглодог.
Иргэдийн хариуцлагагүй үйлдлээс үүдэн байгаль орчин, экологид их хэмжээний хохирол учирч байна. Сүүлийн өдрүүдэд шар өвсний түймэр эрс нэмэгдэх хандлагатай байна. Тухайлбал, энэ сарын 4-ний өдөр Сонгинохайрхан дүүргийн 40 дүгээр хороонд гарсан шар өвсний түймрийн улмаас таван айлын гэр, хашаа шатаж, иргэдийн эд хөрөнгөд хохирол учирсан тохиолдол бүртгэгдсэн.
Ялангуяа Богд уул руу алхаж буй иргэд ил гал асааж, хоол, цай хийх тохиолдол их байна. Иймд Нийслэлийн онцгой байдлын газраас “Шар өвс шатахуун адил шатдаг” аяныг эхлүүлж, холбогдох байршлуудад хяналтын пост ажиллуулан иргэдэд тогтмол анхааруулга өгч байна. Гэсэн хэдий ч зарим иргэн алба хаагчдын анхааруулгыг үл ойшоон ил гал гаргасаар байна” гэлээ.
