Азийн олимпын зөвлөлөөс зохион байгуулж буй “Саньяа 2026” Азийн элсний VI наадмын медалийн эзэд тодорч эхэллээ. Наадмын хөтөлбөрт багтсан шинэ төрлийн нэг бол триатлон буюу акуатлон байсан юм. Энэ төрөлд манай улсаас 16 настай Э.Шинэ-Од, 18 настай Ц.Аяас нар өрсөлдлөө. Усан спортоор хичээллэдэг манай тамирчдын хувьд анх удаа элсний наадамд тивийнхээ шилдгүүдтэй өрсөлдөв. Энэ төрөлд Хятадын тамирчид эхний гурван байрт оржээ.
16 настай Э.Шинэ-Одын хувьд энэ наадмын хамгийн залуу оролцогчийн нэг бөгөөд акуатлон төрлийн анхны оролцогч боллоо. Акуатлонд өрсөлдсөн тамирчид 2,5 км гүйсний дараа 1 км сэлэлт хийж, дараа нь 2,5 км гүйж барианд оржээ.
Өнөөдөр манай улсаас жюү жицүгийн төрөлд эмэгтэйчүүдийн -52 кг-д М.Хүслэн, эрэгтэйчүүдийн -62 кг-д Б.Баяртулга нар өрсөлдөнө.
