Монгол Улс дахь хүний эрх, эрх чөлөөний байдлын талаарх 25 дахь илтгэлийг танилцууллаа.
ХЭҮК-ийн дарга Э.Сүнжид "Эрүүл мэндээ хамгаалуулах эрхийн хүрээнд бид системийн шинжтэй өөрчлөлт хийхгүй бол иргэдийн эрх бүрэн хангагдахгүй байна. Эрүүл мэндийн бодлоготогтолцоо тогтворгүй, байнга өөрчлөгдөж ирсэн нь иргэдийн эрхэд сөргөөр нөлөөлж, өрхийн санхүүд дарамт учруулж байна. Иймээс бид энэ удаа уг сэдвийг онцлон авч үзсэн. Түүнчлэн эмийн чанарын асуудал ноцтой түвшинд хүрсэн нь судалгаагаар харагдсан. Иймд эрүүл мэндтэй холбоотой асуудлуудыг цогцоор нь судалсан. Мөн шүүх шинжилгээ, хүний эрхийн асуудлын хүрээнд гэмт хэргийг мөрдөн шалгах, шүүхээр хянан шийдвэрлэх үйл явцад чухал үүрэгтэй байгууллагуудын хүний нөөц, санхүү, технологийн чадавх ямар түвшинд байгааг үнэлж дүгнэсэн” гэв.
Нийт зургаан бүлгийн хүрээнд 65 санал боловсруулжээ.Үүнд:
- Эрүүл мэндээ хамгаалуулах, эрүүл мэндийн тусламж, үйлчилгээ авах эрхийн хэрэгжилт;
- Шүүх шинжилгээ ба хүний эрх;
- Олон нийтийн мэдэх эрхийн төлөв байдал;
- Хүний эрх хамгаалагчийн эрхийн хэрэгжилт;
- Хүүхэд хамгааллын тогтолцооны анхаарах зарим асуудал;
- Жендэрийн эрх тэгш байдлыг хангахад эрэгтэйчүүдэд тулгарч буй асуудал багтжээ.
Энэ удаа ХЭҮК анх удаа "Шүүх шинжилгээ ба хүний эрх" сэдвийг судалсан бөгөөд шүүх шинжилгээний байгууллага жилд дунджаар 35 мянган хэргийн газрын үзлэг, 75 мянган үнэлгээг гаргадаг аж. Өдөрт дунджаар 200 гаруй шинжилгээнд оролцож байна. Ингэхдээ ШШЕГ-ын ажилчид ажлын бус цагаар, цалин хөлсгүйгээр цогцостой харьцаж, оршуулгын зан үйлд оролцдог аж.
Энэ талаар ХЭҮК-ын Гомдол, хяналт шалгалтын хэлтсийн дарга Г.Ууганбаяр “ ШШЕГ-ын алба хаагчид цогцсыг ар гэрт нь хүлээлгэн өгөх урьдчилсан бэлтгэл нь шөнө, эсвэл ажлын бус цагт хийгддэг. Энэ нь ажлын тодорхойлолтод нь заагдаагүй. Ажлын ачаалал, биологийн цагаар амрах, цалин хөлс, илүү цагийн урамшуулал авах эрхийг зөрчиж байна” гэв.
