Венесуэлийн баруун хэсгийн Баринас шоронгийн хоригдлууд ням гарагт дээвэр дээр гарч эсэргүүцэл илэрхийлэн, матрас шатаажээ. Энэ үеэр зэвсэггүй хоригдлууд руу гал нээсэн гэж буруутгасан шоронгийн захирлыг огцруулахыг шаардлаа.
“Бид шударга ёс хүсэж байна. Харгалзагчид болон хамгаалагчид бидэн рүү буудаж байна” хэмээн нэгэн хоригдол цээжин тус газраа сумны шархтай харагдах хүний дүрс бүхий бичлэгт хэлжээ. Уг бичлэгийг Венесуэлийн шоронгуудын ажиглалтын Venezuelan Observatory of Prisons байгууллага X платформд нийтэлсэн байна.
Хоригдлуудын хэлснээр тэд тайван жагсаж байхад шоронгийн ажилтнууд гал нээж, зарим хүнийг шархдуулжээ.
Каракасаас 500 км-ийн зайд орших тус шоронгоос шатаж буй матрас болон орны даавуунаас өтгөн утаа суунаглаж, хоригдлууд дээвэр дээр цуглан “Тамлалтаа зогсоо!” хэмээн хашхирч, “SOS” гэсэн бичигтэй баннер өлгөжээ.
Хоригдлууд бичлэгүүддээ шоронгийн захирлыг огцруулахыг шаардсан байна. Тэд хувцсыг нь хураан авч, уулзалт хүлээн авахыг хориглосон гэж мэдэгджээ.
Хоригдлуудын ар гэрийнхэн шоронгийн гадна үймээний бамбайтай Үндэсний гвардын алба хаагчидтай мөргөлдөж, тэднийг шорон руу орохыг зогсоохоор оролдсон ч амжилтгүй болсон байна. Тэд үүний дараа хашгирах дуу болон дэлбэрэлт сонссон тухай Венесуэлийн шоронгуудын ажиглалтын байгууллагад ярьжээ.
Елитза Арролло AFP агентлагт ярихдаа, шоронд хоригдож буй хүүгээсээ тавдугаар сарын 8-наас хойш ямар ч сураг сонсоогүй гэжээ.
Венесуэлийн шоронгуудын ажиглалтын байгууллага уг үйл явдлыг баримтжуулж, хүний эрхийн байгууллагуудад мэдээлж байгаа талаараа мэдэгджээ. Тус шоронд хоригдож буй ойролцоогоор 1200 эрэгтэй, 100 гаруй эмэгтэй хоригдол эсэргүүцлийн жагсаалд нэгдсэн байна.
Венесуэлийн түр Ерөнхийлөгч Делси Родригез улс төрийн хоригдол гэж үзсэн хэдэн зуун хүнийг суллах хууль баталсны дараа тус улсын шоронгууд олон улсын анхаарлын төвд орсон юм.
Нэгдүгээр сард АНУ Каракас руу ажиллагаа явуулж, тухайн үеийн Ерөнхийлөгч Николас Мадурог баривчилсан билээ.
