Бортээгийн ордыг эдийн засгийн эргэлтэд оруулах зорилгоор төсөлд хөрөнгө оруулж, хамтран ажиллах хөрөнгө оруулагчийг сонгох олон улсын нээлттэй тендер зарлаж байгаа талаар "Эрдэнэс Монгол” нэгдлийн гүйцэтгэх захирал Б.Даваадалай, "Эрдэнэс Тавантолгой" компанийн гүйцэтгэх захирлын үүргийг түр орлон гүйцэтгэгч Н.Цэрэнсамбуу нар мэдээлэл хийлээ.

Бортээгийн ордыг эдийн засгийн эргэлтэд оруулах шийдвэрийг Засгийн газар гаргаж хөрөнгө оруулагчийг сонгон шалгаруулах материалыг боловсруулах ажлын хэсэг байгуулсан. Тус ажлын хэсгийг Эдийн засаг хөгжлийн сайд Ж.Энхбаяр ахалж, бүх яамны төлөөллийг орж олон улсын нээлттэй сонгон шалгаруулалтын материалыг бэлтгэжээ. Ингээд материалаа Засгийн газарт гурван удаа танилцуулж энэ долоо хоногийн Засгийн газрын хуралдаанаар сонгон шалгаруулалт зарлах эрхээ авсан байна. Сонгон шалгаруулалтыг нэг сарын хугацаанд зарлах бөгөөд дотоод гадаадын аж ахуйн нэгжүүдийг саналаа ирүүлэхийг уриаллаа. Хөрөнгө оруулагч компанид дэд бүтэц, ажлын байр бий болгох, төмөр зам, авто зам, баяжуулах үйлдвэр барих шаардлагыг тавьж байгаа аж. Сарын хугацаанд ирсэн материалуудыг Засгийн газар, УИХ-д танилцуулах юм байна. Сонгон шалгаруулалтын бичиг баримтыг орлого хуваах хувилбараар боловсруулсан гэдгийг албаныхан хэллээ. Нийт 1000 онооны шалгуур үзүүлэлтүүдээр ажлын хэсэг сонгон шалгаруулалтын үнэлгээг хийнэ. Ингээд 700-аас дээш оноо авсан аж ахуйн нэгжтэй хэлэлцээр хийхээр баримт бичгийг бэлджээ.

Хөрөнгө оруулагчаа шалгаруулсны дараа хөрс хуулалтыг энэ ондоо багтаад эхлүүлэх боломжтой гэж тооцож байгаа аж. Харин 2028 онд ордын бүтээгдэхүүнийг борлуулж эхлэхээр тооцож байгаа аж.

"Эрдэнэс Тавантолгой" компанийн гүйцэтгэх захирлын үүргийг түр орлон гүйцэтгэгч Н.Цэрэнсамбуу: -Бортээгийн орд бол "Эрдэнэс Тавантолгойн Цанхийн хэсгийн урд хэсэгт байрладаг. 424.2 сая тонны нөөцтэй бөгөөд жилдээ 2-15 сая тонн нүүрс олборлох хүчин чадалтай. Энэ удаад орлон хуваах дээр нэмэх нь бүтээгдэхүүн борлуулж байгаа нэгжийн өртгийн нэгж үнээс хамааруулаад ашгийн хувиа нэмэгдүүлэх загвараар хөрөнгө оруулагчийг урих баримт бичгийг боловсруулсан. Энэ хувилбарын давуу тал нь хөрөнгө оруулагч тал зардлыг бууруулах, нэмэгдүүлэх боломжгүй. Бүтээгдэхүүнийг зарахдаа Биржийн тухай хуулиар зарна. Үнэтэй зарах тусам Монгол Улсын хүртэх үр өгөөж нэмэгдэх, хөрөнгө оруулагч талын зардлыг хянах шаардлагагүй.

“Эрдэнэс Монгол” нэгдлийн гүйцэтгэх захирал Б.Даваадалай: -Дотоод гадаадын аж ахуйн нэгжид Бортээгийн ордод хамтран ажиллах санал тавьж байна гэсэн үг. Сонгон шалгаруулалтын материалыг нэг сарын хугацаанд авна. Тухайн ордод хөрөнгө оруулах аж ахуйн нэгжтэй хамтраад өгөөжийн 50-иас доошгүй хувийг Засгийн газар хүртэнэ гэдэг зарчмыг баримталж байгаа. Мөн хөрөнгө оруулагч ордын дэд бүтэц, төмөр зам, авто зам, баяжуулах үйлдвэрийг цогцоор нь шийдэх ёстой.