БНХАУ-д болсон Олон улсын хиймэл оюуны хоёрдугаар олимпиадад 61 орны 284 сурагч хоёр өдрийн туршид машин сургалт, хиймэл оюуны зургаан бодлогыг бодож оюун ухаанаа уралдуулан өрсөлдлөө.
Тэмцээний дүн гарахад Ч.Ирмүүн /Эрхэт Эрдэм сургууль, 12-р ангийн сурагч/, С.Хангэрэл /Оюунлаг сургууль,11-р ангийн сурагч/ нар хүрэл медалийн болзол хангалаа. Мөн сурагч Ү.Эрхэс /Хобби сургууль, 10-р ангийн сурагч/ тусгай байрт шалгарчээ.
Энэ удаагийн олимпиадад тооцооллын дэд бүтэц буюу GPU-г хэрхэн үр бүтээлтэй ашиглах талаар оролцогчдын ур чадварыг сорьж байв. Түүнчлэн олимпиадад оролцогчид БНХАУ-ын технологи, шинжлэх ухааны паркуудаар зочилж, Цинхуа, Бээжингийн их сургуулийн эрдэмтдийн илтгэлийг сонирхлоо.
Олимпиадын үеэр олон улсын 40 орчим их сургууль, технологийн компани өөрсдийн бүтээгдэхүүн үйлчилгээ, сургалтын онцлогийг харуулсан үзэсгэлэнг зохион байгууллаа.
