Сербийн Ерөнхийлөгч Александр Вучич ням гарагт болсон түүхэн сонгуульд оюутнуудын удирдсан эсэргүүцлийн хөдөлгөөнд ялагдсанаа хүлээн зөвшөөрлөө. Ингэснээр түүний олон жил үргэлжилсэн эрх мэдлийн ноёрхол төгсөж, Балканы хойгийн тус улсад улс төрийн шинэ үе эхлэхээр болж байна.
“Оюутны жагсаалт”-ын ялалтын талаар олон улсын улс төрийн удирдагчдын илэрхийлсэн байр суурийг хүргэж байна.
Марта Кос — Европын Холбооны өргөжилтийн асуудал эрхэлсэн комиссар
“Серби улс дуу хоолойгоо өргөлөө. Ардчилал, хууль дээдлэх ёс, авлигын эсрэг тэмцлийн төлөө бараг хоёр жил үргэлжилсэн эсэргүүцлийн жагсаалын дараа Сербийн иргэд түүхэнд байгаагүй өндөр ирцтэйгээр сонгуульд оролцлоо” гэж Кос Брюссель дэх Словенийн сурвалжлагчдад зориулан гаргасан мэдэгдэлдээ бичжээ.
Урсула фон дер Ляйен — Европын Комиссын Ерөнхийлөгч
“Өнөөдөр Сербийн ард түмэн улс орныхоо ирээдүйг тодорхойлохын тулд түүхэн дээд хэмжээний ирцтэйгээр сонгуульд оролцлоо.
Парламентын сонгуульд ялалт байгуулсан “Оюутны жагсаалт”-д баяр хүргэе.
Бид хууль дээдлэх ёс, хэвлэл мэдээллийн эрх чөлөө, авлигатай тэмцэх үйл ажиллагаа болон ардчилсан институцуудыг бэхжүүлэх шинэчлэлийг дэмжихэд бэлэн байна. Мөн Сербийн Европын Холбоонд нэгдэх ирээдүйг урагшлуулахын төлөө хамтран ажиллахад бэлэн байна” гэж X нийгмийн сүлжээнд бичжээ.
Ален Берсе — Европын Зөвлөлийн Ерөнхий нарийн бичгийн дарга
“Сербийн Оюутны жагсаалт”-д сонгуулийн ялалтад баяр хүргэе.
Сербийн иргэд ардчилсан сонголтоо хийлээ. Ерөнхийлөгч асан Вучич сонгуулийн үр дүнг хүлээн зөвшөөрч, эрх мэдлийг ардчилсан замаар тайван шилжүүлэх амлалт өгснийг бид сайшааж байна.
Европын Зөвлөл хүний эрх, ардчилал, хууль дээдлэх ёсыг бэхжүүлэхийн төлөө Сербийн ардчилсан сонгуулиар сонгогдсон удирдлагатай хамтран ажиллахад бэлэн байна.
Та бүхний тууштай байдал, эрч хүч, Европын үнэт зүйлс болон Сербийн ирээдүйн төлөөх хүчин чармайлт өнөөдрийн энэ амжилтад хүргэлээ. Та бүхэн бидний дэмжлэгт найдаж болно” гэж X нийгмийн сүлжээнд бичжээ.
Милойко Спаич — Монтенегро улсын Ерөнхий сайд
X Нийгмийн сүлжээнд “Өнөөдөр Сербид болсон үйл явдал нь ард түмний хүсэл зориг, ирээдүйгээ чөлөөтэй шийдэх эрх нь ардчилсан аливаа өөрчлөлтийн үндэс суурь байдгийг тод томруун сануулж байна.
Хоёр улсын иргэд дипломат харилцаан дахь үл ойлголцол хэр гүнзгий байгаагаар бус, хамтын ажиллагааны бодит үр дүнгээр хэмжигдэх харилцаатай байх эрхтэй” гэжээ.
Петер Мадьяр — Унгар улсын Ерөнхий сайд
“Би саяхан Сербийн сонгуульд ялалт байгуулсан “Оюутны жагсаалт”-ын удирдагчидтай утсаар ярьж, ялалт байгуулсанд нь баяр хүргэлээ. Мөн Унгар улсын зүгээс тэднийг дэмжинэ гэдгийг илэрхийлсэн.
Дөрөвдүгээр сард бидний байгуулсан ялалт энэхүү хүнд хэцүү тэмцлийн явцад тэдэнд ямар их хүч, урам зориг өгснийг сонсоод үнэхээр баяртай байлаа” гэж X нийгмийн сүлжээнд бичжээ.
