Үндэсний бахархалт хайрхан Бурхан Халдун уулыг тахих тахилга өчигдөр боллоо. Ёслолд Ерөнхий сайд У.Хүрэлсүх, УИХ-ын нэр бүхий гишүүд болон Ерөнхийлөгчийн Тамгын газар, Зэвсэгт хүчний Жанжин штаб, Бурхан шашинтны төв Гандантэгчинлэн хийд зэрэг байгууллагын төлөөлөл, Хэнтий аймгийн удирдлагууд, иргэд оролцов.

Энэ үеэр Ерөнхий сайд У.Хүрэлсүх “Монгол туургатны эх түүхийн голомт нутаг Бурхан Халдун хайрхан нь их эзэн Чингис хааны намтар цадигийг хадгалсан, эх түүхийн голомт, ариун дагшин шүтээн ашдын заяат нутаг юм. Өвгөдөөс өвлүүлсэн өлгий нутаг, өв соёл, билэг оюуныг үеэс үед дархлан тэтгэж, уламжлан баяжуулж явах учиртай” гэдгийг тэмдэглэв.

1995 онд Ерөнхийлөгч зарлиг гарган Бурхан Халдун уулыг Төрийн тахилгат уул болгосон бөгөөд 2013 онд Засгийн газар Үндэсний бахархалт хайрханаар зарласан юм. Мөн 2015 онд ХБНГУ-ын Бонн хотноо болсон ЮНЕСКО-гийн Дэлхийн өвийн хорооны чуулганаар Бурхан Халдун уул, түүнийг хүрээлсэн тахилгат газар нутгийг Дэлхийн өвийн жагсаалтад соёлын ангиллаар бүртгэжээ.