Бонди эрэгт болсон буудлагын хэрэгт буруутгагдаж буй Навийд Акрам өөрийн гэр бүлийн гишүүдийн хувийн мэдээллийг хэвлэл мэдээллээр нийтлэхийг хориглох шүүхийн шийдвэр гаргуулах хүсэлт гаргажээ.
24 настай Акрам нь 2024 оны 12-р сарын 14-нд болсон еврейн баярын үеийн халдлагатай холбоотойгоор 59 хэрэгт, үүнээс 15 нь хүний амь насыг хөнөөсөн хэргээр буруутгагдаад буй.
Түүний өмгөөлөгч Сидней хотын шүүхэд ээж, ах, эгч нарынх нь нэр, хаяг, ажил болон сургууль зэрэг мэдээллийг нийтлэхийг хориглох хүсэлт гаргажээ. Шүүгч Грег Гройн олон улсын анхаарал татсан хэрэг тул түр хугацааны хориг гаргасан ч Акрамын ээжийн нэр аль хэдийн өргөн тархсан талаар дурдсан байна.
News Corp Australia компанийн өмгөөлөгч уг шийдвэрийг эсэргүүцэж магадгүй гэж мэдэгдсэн бөгөөд асуудлыг ирэх долоо хоногт дахин хэлэлцэхээр болжээ.
Буудлагын дараа Акрамын ээж хэвлэлд ярилцлага өгч хүүгээ өмгөөлсөн бөгөөд эцэг Сажид Акрам нь халдлагын үеэр цагдаатай буудалцах үедээ амиа алдсан юм.
Хүнд шархадсан Навийд Акрам гэм буруугаа хүлээсэн эсэх талаар мэдэгдээгүй байна. Өнгөрсөн сард анх шүүхэд оролцохдоо зөвхөн “тийм” гэсэн нэг л үг хэлсэн.
Прокуроруудын мэдээлснээр халдлагыг хоёр зэвсэгт этгээд үйлдсэн бөгөөд тэд Исламын улс бүлгээс санаа авсан ч томоохон сүлжээний нэг хэсэг биш байсан гэж үзэж байна.
Энэ халдлага нь Австралид 1996 онд болсон Port Arthur дахь түүхэн аялал жуулчлалын бүсэд болсон олон хүний амь эрсэдсэн буудлагын хэргээс хойших хамгийн том олныг хамарсан буудлага болсон юм.
