Засгийн газрын хуралдаанаар Тавантолгойн цахилгаан станцыг төрийн өмчийн хөрөнгөөр барих шийдвэр гаргасан. Энэ талаар Эрчим хүчний сайд Ц.Даваасүрэн мэдээлэл хийлээ. Тэрээр “400 МВт-ын хүчин чадалтай цахилгаан станцыг төрийн өмчийн хөрөнгөөр барьж, 2024 онд ашиглалтад оруулахаар шийдвэрлэлээ. Станцын ТЭЗҮ-ийг өмнө нь боловсруулсан байсан. Энэ ТЭЗҮ-ийг үндэслэн, 560-600 сая ам.доллараар барина. Станцын хөрөнгө оруулалт “Оюутолгой”  компанийн санал болгосноос 30 хувь бага, эрчим хүчний өртгийн хувьд 50 хувь хямд байна. Хөрөнгө оруулалтаа таван жилд нөхнө. Санхүүжилтийг “Эрдэнэс-Тавантолгой” компанид түшиглэн босгохоор тооцоолсон. Шийдвэр гаргасан тул маргаашаас санхүүжилтээ босгох ажил өрнөнө гэсэн үг. Санхүүжилт хүндэрвэл бонд босгох замаар санхүүжилтээ гаргана” гэсэн юм.

Тэрээр үргэлжлүүлэн "Хөрөнгө оруулалтын гэрээнд "Оюутолгой" компани ажлаа эхлүүлснээс хойш дөрвөн жилийн дотор дотоодоос эрчим хүчээ хангана гэж заасан.  Хоёр жилийн өмнө байгуулсан гэрээнд ч ийм заалт байгаа. Бид 330 кВт-ын шугам сүлжээ татаж өгсөн. Дэд бүтцээ бий болгочихсон. Гэсэн ч харилцан ойлголцолд хүрч, гэрээний заалтыг хэрэгжүүлсэнгүй. Тиймээс бид төрийн өмчийн хөрөнгөөр цахилгаан станц барих шийдвэр гаргалаа. Бид нэг жилд 170-200 сая ам.долларыг эрчим хүчний импортод зарцуулж байгаа. Тэгэхээр 2024 оноос ийм хэмжээний зардлыг хэмнэх боломж бүрдэж байна" гэлээ.