АН-ын "4.11" мэдээллийн цагт намын Ерөнхий нарийн бичгийн даргын үүрэг гүйцэтгэгчээр томилогдсон С.Баярцогт мэдээлэл хийлээ.
Тэрээр "АН цаашид дотоод эв нэгдлээ ханган 2027, 2028 онд дараалсан ялалт байгуулахын тулд боловсон хүчин зохион байгуулалтын болон санхүүгийн олон ажил хийх шаардлагатай. Үүн дээр намын дарга О.Цогтгэрэлтэй нэг баг болж эдгээр ажлыг зохион байгуулан намаа ялалтад хүргэхээр зорьж ажиллана.
Ерөнхийлөгчийн өргөн барьсан УИХ-ын гишүүнийг эгүүлэн татах хуультай холбоотойгоор АН-ын Улс төрийн зөвлөлийн хурлаар гишүүдийн мэдээллийг сонссон. Үүнд дэмжиж байгаа болон эсэргүүцэж буй гишүүд мэдээлэл хийж бодлогын судалгааны байгууллага хөндлөнгийн дүгнэлт хийснээ танилцуулсан. Улмаар уг хуульд зохицуулах шаардлагатай заалтууд байна гэдэгт Улс төрийн зөвлөл санал нэгдсэн. Тухайлбал, авлига, албан тушаалын хэрэгт холбогдсон гишүүдэд хариуцлага тооцох механизм дутагдалтай байна. Одоо байгаагаар нь бүрэн дэмжвэл засаглалын тэнцвэр алдагдаж хүндрэл үүсэж магадгүй. Тиймээс хэлэлцэх эсэхийг дэмжье гэдэгт санал нэгдсэн. Хуулийг парламентаар хэлэлцэх явцад бүх намын төлөөлөл орсон ажлын хэсэг гарч хуулийн үр дагаврыг тооцох хэрэгтэй" гэв.
