Олон нийтийн газруудад байршуулсан сэжиг бүхий QR код, цахим холбооснууд нь мансууруулах эм, сэтгэцэд нөлөөт бодистой холбоотой хууль бус сурталчилгаа, борлуулалтын суваг байх эрсдэлтэй талаар Цагдаагийн ерөнхий газраас анхаарууллаа.

Тодруулбал, орон сууцны хороолол, барилга байгууламж, сүлжээ дэлгүүрийн орчин, банкны автомат төхөөрөмж байрлах хэсэг, автомашины зогсоол, тоглоомын талбай зэрэг хяналтын камер сул байршлуудад сэжигтэй QR код, бичиглэл байрлуулах тохиолдол илэрчээ. Иймд иргэдийг үл таних, сэжигтэй QR код, цахим холбоосыг гар утсаараа уншуулахгүй байхыг зөвлөв.

Мөн цагдаагийн байгууллагаас  уг асуудалтай холбоотойгоор камерын бичлэгт дүн шинжилгээ хийж, холбогдох этгээдүүдийг илрүүлэн таслан зогсоох ажиллагааг явуулж байгаа аж.

Мөн аж ахуйн нэгж, байгууллагуудад хууль бус QR код, бичиглэл, наалтыг нэн даруй арилгах, дахин байрлуулах нөхцөлийг бүрдүүлэхгүй байх чиглэлээр зөвлөмж хүргүүлжээ. Иймд иргэд дээрх төрлийн сэжигтэй наалт, бичиглэл илрүүлсэн тохиолдолд цагдаагийн байгууллагын 102 дугаар болон Хар тамхитай тэмцэх албанд мэдээлэхийг уриаллаа.