Хууль зүй, дотоод хэргийн сайд С.Амарсайхан сэтгүүлчдэд мэдээлэл өглөө.

Тэрээр "Би УИХ-ын чуулганы хуралдаан дээр маш тодорхой байр сууриа илэрхийлчихсэн. Нэгдүгээрт, бодлого, хоёрдугаарт хуулийг хэрэгжүүлэх, гуравдугаарт авлига гүтгэлэгийн асуудлуудын зүг чигийг тодорхой болгож ялгааг нь гаргана. Иргэд хуулиас айдаг биш, дээдэлдэг, хууль иргэнээ хамгаалдаг, шударга ёсыг шударгаар тогтоох ууль журмын хэрэгжилтийг холбогдох байгууллагуудаас шаардаж ажиллана.

Шүүхийн мэдлийн хөгжлийн бодлого гэж бий. Энэ хүрээнд хийгдэж байгаа ажлууд олон байна. Шинээр УИХ-д орж хэлэлцүүлэх ажлууд байна. Хэлэлцэгдэх шатандаа яваа хуулийн төслүүд бий. Тухайлбал, Хувийн эрх зүйн байдлын тухай, Эрүүгийн хууль, Шүүх байгуулах тухай, Гэр бүлийн тухай хуулийн төсөл байна. Шүүхийг тойргийн журмаар уу, бүсчилсэн журмаар байгуулах уу гэдэг асуудал байна. Шүүхийн шинэчлэлийн хүрээнд цахимжилтийн ажил маш хурдтай явж байна. Гэхдээ гацсан асуудууд байна. Энд тэнд гацсан хэргүүд байна. Өнөөдөр Засгийн газрын хуралдаанаар 12000 аж ахуйн нэгжийн дансыг нээх шийдвэр гаргалаа. Эдийн засгийн хүнд үед дансыг нь хааж үйл ажиллагаа явуулах боломжгүй болгочихаад татвараа төл гэдэг зүй бус дарамт байж болохгүй. Тиймээс 12 000 аж ахуйн нэгжийн дансыг өнөөдрөөс эхлээд нээх шийдвэр гаргасан. Шүүхийн шийдвэргүйгээр аж ахуйн нэгжүүдийн дансыг хаана гэдэг бол байж болохгүй, хууль бус үйлдэл. Аж ахуйн нэгжүүдийн банкин дахь данс бол тухайн хувийн хэвшлийн өмчийн объект. Үүнд зүй бусаар хандаж байгаа татварын үйлчилгээг таслан зогсоох ёстой.

Цаашдаа Шүгэл үлээгчийн тухай хуулиа хэлэлцүүлэх ёстой. ШШГЕГ-ын тухай хуулийг шинэчлэх ёстой" гэв.