Олон Улсын Хөлбөмбөгийн Холбоо (FIFA)-ны ерөнхийлөгч Жанни Инфантино 2026 оны хөлбөмбөгийн ДАШТ-ийг шүүмжлэгчдийг үзэн ядалт болон худал мэдээлэл тарааж байна хэмээн буруутгасан захидлыг инстаграм хуудсаараа дамжуулан нийтэлжээ. АНУ, Канад, Мексик улсуудад зохион байгуулагдаж, Испанийн шигшээ багийн ялалтаар өндөрлөсөн тус тэмцээнийг тэрээр баяр баясгалан, эв нэгдэл, аюулгүй байдлыг бүрэн хангаж чадсан томоохон амжилт болсон хэмээн өмгөөлсөн байна. Инфантино шүүмжлэгчид болон хэвлэл мэдээллийнхэнд хандан "Та бүхэн үзэн ядалтдаа хэт автсанаасаа болоод энэ бүх баяр баясгаланг олж харсангүй. Таныг дэлгэцийн цаанаас шүүмжилж суух хооронд FIFA-гийн хамт олон тэргүүн шугам дээр ажиллаж, дэлхийн хамгийн шилдэг шоуг үзүүлж чадлаа" хэмээжээ.

Тэмцээний үеэр АНУ-ын визний хязгаарлалтын улмаас Иран, Гаити зэрэг орны шигшээ багууд болон зарим шүүгчдэд логистикийн бэрхшээл тулгарсан талаарх шүүмжлэлд тэрээр хариулахдаа, хөлбөмбөг нь улс төрөөс ангид бөгөөд сая сая хүмүүс визээ авч, тэмцээн ямар нэгэн зөрчилгүй хэвийн үргэлжилснийг дурдсан байна. Мөн Ерөнхийлөгч Дональд Трампын оролцоотойгоор Америкийн шигшээ багийн довтлогч Фоларин Балогун улаан хуудасны шийтгэлээ цуцлуулсан явдал болон ДАШТ-ий шүүгчидтэй холбоотой маргаанд хариу өгөхдөө, иймэрхүү шийдвэрүүд дэлхийн томоохон лигүүдэд тогтмол гардаг хэвийн үзэгдэл хэмээн тайлбарлажээ. Түүнчлэн Инфантиног Дональд Трамптай ойр харилцаатай байж, улс төрийн хувьд төвийг сахиагүй гэх гомдлыг Олон улсын олимпын хороо хэрэгсэхгүй болгосон гэдгийг дурдаад шүүмжлэгчдийг тэмцээнд оролцсон баг тамирчдад хүндэтгэлтэй хандахыг уриалсан байна.