Монголчуудын ихэнх нь намхан нуруу, навтгар хамартай. Энэ бол бидний онцлог. Гэвч бидний дунд “европжуу”, бараг тэднээс ч илүү өндөртэй нэгэн эмэгтэй даруухнаар амьдарч байна. Түүнийг Б.Рэнцэнхорлоо гэх бөгөөд тэрээр 2.05 метр өндөртэй. Саяхан Б.Рэнцэнхорлоогийн зураг цахим ертөнцөд цацагдсан нь олны анхаарлыг ихэд татсан. Тиймээс бид түүнтэй онлайнаар холбогдож, цөөн хором ярилцлаа.
Манай уншигчид түүнийг Гавьяат тамирчин, сагсчин Ц.Шаравжамцын дүү, Монголын хамгийн өндөр эмэгтэй гэдгээр нь андахгүй. Тэрээр “Надад өндөр гэхээс өөр ярих зүйл байхгүй шүү дээ” гэх гэсээр бидний яриа эхэлсэн юм.
-Монголд ийм өндөр хүн байдаг юм уу гэж гайхах хүмүүс олон-
-Танд энэ өдрийн мэнд хүргэе. Манай уншигчдад өөрийгөө танилцуулахгүй юу?
-Баярлалаа. Танд болон уншигчдадаа энэ өдрийн мэнд хүргэе. Намайг Буд овогтой Рэнцэнхорлоо гэдэг. Одоо 25 настай. МУИС-ийн Солонгос судлалын ангийг 2011 онд төгсөж, гурван жилийн дараа Сөүл хотын Их сургуульд магистр хамгаалсан. Одоо Солонгос улсад утасны компанид ажиллаж байна.
-Манай уншигчид таныг сагсчин Ц.Шаравжамцын дүү гэдгээр илүү сайн мэддэг. Ц.Шаравжамц таны ойрын хамаатан юм уу?
-Ц.Шараваа ах бол миний аавын төрсөн дүү. Миний авга ах гэсэн үг. Намайг өндөр болохоор Д.Шаравжамц ахын төрсөн дүү нь гэж зарим хүн андуурдаг юм шиг байна лээ.
-Танай удамд та хоёроос өөр өндөр хүн бий юү?
-Манайхан ер нь бүгд өндөр. Манай аав, ээж хоёр ч бас хоёулаа өндөр. Хүмүүс өндөр Гонгорын удам уу гэж их асуудаг шүү. Гэхдээ би тэр хүнтэй ямар ч хамаагүй. Бас Шараваа ахын хоёр хүү их өндөр. Сагс тоглодог залуус бий.
-Аав, ээж хоёр тань хэр зэрэг өндөр вэ?
-Аав 2 метр 8 см, ээж маань 1 метр 84 см өндөртэй.
-Ер нь их өндөр хүмүүс байх нь. Таны хувьд багаасаа л их өндөр хүүхэд байсан уу?
-Тийм. Гэхдээ анх төрөхдөө жирийн хүүхдүүдтэй адилхан өндөртэй байсан гэдэг. Ээж маань намайг 51 см, 3.1 килограмм жинтэй төрж байсан гэж хэлж байсан.
-Хэдэн настайгаасаа огцом өсч, бусдаас өндөр болсон юм бэ?
-Ер нь хүүхэд байхдаа үеийнхнээсээ бага зэрэг л өндөр байсан. Харин дунд ангид орох үед огцом өсч байгаа маань мэдрэгдэж эхэлсэн. Тавдугаар ангид орохдоо бараг 180 см байсан. Тэгээд 17 нас хүрээд яг одооных шигээ буюу 2метр 5 см өндөртөй болсон.
-Өөрөө зорилгодоо хүрч чадаагүй ч, мундаг тамирчин төрүүлнэ-
-Таныг өндөр болоход удам их нөлөөлсөн нь мэдээж. Мөн спортоор хичээллэвэл бие бялдар хөгжиж, өндөр болдог гэдэг. Та ямар нэгэн спортоор хичээллэдэг үү?
-Би усан спортоор хичээллэдэг. Багадаа хөнгөн атлетик, сагсан бөмбөг, волейболын дугуйланд явдаг байсан. Ер нь манай гэр бүлийнхэн бүгд спортод дуртай, хайртай. Манай ээж Монголын волейболын шигшээ багт тоглодог байсан. Манай аавын ээж н.Борхүү гэдэг волейболын мастер хүн байсан гэдэг. Хүмүүс анддаггүй юм билээ. Харин манай өвөө Монголд анх удаа цагираган дээрээс тохсон Цэрэнжанхар гээд мундаг сагсчин хүн байдаг. Шараваа ахын аав нь шүү дээ.
-Таны бага нас спорттой салшгүй холбоотой байжээ. Мундаг тамирчин болж эмээ, өвөөгийнхөө амжилтыг үргэлжлүүлье гэж боддог уу ?
-Би ч гэсэн спортод их дуртай, хайртай. Харамсалтай нь нуруугаа гэмтээж, мэс засалд орсноор спортоо орхиход хүрсэн.
-Харамсалтай зүйл болжээ. Юунаас болж нуруугаа бэртээсэн юм бэ?
-Хэт их өсөөд, дээр нь үргэлж хүнд цүнх үүрсээр байгаад нуруугаа гэмтээчихсэн. Америкт мэс засалд орсон. Одоо нуруу маань эрүүл болсон ч спортоор үргэлжлүүлэн хичээллэх боломжгүй. Уг нь Монголынхоо нэрийг дэлхийд дуурсгасан мундаг тамирчин болно гэж боддог байлаа. Одоо харин эх орныхоо нэрийг гаргах тамирчинг төрүүлнэ гэж боддог шүү.
-Найзууд маань “Чамтай сууж удмаа өндөр болгоно” гэж хошигнодог-
-Өндөр байхын хэцүү болон сул тал нь юу вэ?
-Бага байхдаа бусдаас нэг л өөр юм шиг санагдаад ичиж, санаа зовдог байлаа. Харин одоо тэгэхээ больсон. Сандал, ширээ намдаад, таарахүй байх гээд хэцүү зүйл хааяа тохиолддог. Мөн нийтийн тээврийн хаалга болон өөр бусад хаалгууд намхан болохоор заримдаа хүндрэлтэй байдаг. Мэдээж давуу тал ч олон бий. Метронд хүмүүс нэг агаараар амьсгалж байхад би ганцаараа тэднээс дээгүүр өөр агаараар амьсгална /инээв/.
-Солонгосууд таныг хэрхэн хүлээж авсан бэ. Гайхаж хардаг байсан болов уу?
-Би бусдаас өндөр л болохоос өөр гарагийн хүн биш шүү дээ. Солонгосууд болон өөр бусад улс орны хүмүүс надад их сайн ханддаг. Шууд ирээд хэдэн метр өндөр вэ гээд асууна. Хамт зургаа авхуулъя гэдэг. Бас аль улсын иргэн бэ гээд их сонирхдог.
-Монголчууд төдийгүй азийнхан ихэнх нь намхан нуруутай. Монгол хүн гэхээр гайхдаг байх даа?
-Монголчууд ийм өндөр юм уу, Монголд ийм өндөр хүн байдаг юм уу гээд их гайхаж, сонирхдог.
-Нууц биш бол та найз залуутай юу?
-Олон залуу үерхэх санал тавьдаг. Гэхдээ одоо найз залуу байхгүй ээ.
-Таны найзууд хэр өндөр вэ. Үерхэх санал тавьж байсан залуучууд тань өндөр үү?
-Янз бүр шүү. Гэхдээ надаас өндөр залуу таарч байгаагүй юм байна. Зарим эрэгтэй найзууд маань “Чамтай гэрлэж удмаа өндөр болгоно оо” гэж тоглоом хийдэг.
-Дуучин Т.Дэлгэрмөрөн ах надад “Чи Монгол бахархал шүү” гэж хэлсэн-
-Олонх хүн өндөр, нуруулаг биетэй байхыг хүсдэг шүү дээ. Та ч гэсэн ийм сайхан өндөр болсондоо баярладаг уу?
-Бахархалгүй яахав. Ховорхон хувь тохиол шүү дээ. Нэг удаа дуучин Т.Дэлгэрмөрөн ах надад “Урлагийн хүмүүс маш их хөдөлмөрлөж байж олны танил болдог. Харин чиний байгаа байдал чинь л бусдын анхаарлыг татдаг, ховорхон хүн. Чи Монгол бахархал шүү” гэж хэлсэн.
-Дэлхийн хамгийн өндөр эмэгтэй БНХАУ-д амьдардаг. Түүний талаар та хэр сайн мэдэх вэ?
-Мэдэлгүй яах вэ. Фэйсбүүкт дэлхийн олон орны нуруулаг бүсгүйчүүдийн зургийг нийтэлдэг хуудас байдаг юм билээ. Тэнд Азиас ганцхан миний зургийг оруулсан байна лээ. Олон орны өндөр, үзэсгэлэнтэй бүсгүйчүүд дунд өөрийгөө харах бүр сайхан байсан. Тэднийг хараад л өндөр эмэгтэй ямар сайхан харагддаг гэдгийг улам их мэдэрсэн шүү.
-Би 45-46 размерийн гутал өмсдөг-
-Та хувцсаа захиалгаар хийлгэж, өмсдөг үү. Манайд ийм том размерын хувцас хэр олдоцтой байдаг вэ?
-Манай ээж Америкт амьдардаг. Ээж маань тэндээс миний бүх хувцсыг явуулдаг. Тэнд том размерын хувцас элбэг. Харин надад гутал олдоггүй. Тэр бага зэрэг хүндрэлтэй байдаг юм.
-Хэдэн размерын гутал өмсдөг вэ?
-Америк размераар 12 буюу, европоор 45-46 өмсдөг.
-Ярилцсанд баярлалаа.
-Баярлалаа. Монголчууддаа эрүүл энхийг хүсье.
