Өнөөдөр УИХ-ын байнгын хороодоор 2026 оны төсвийн гурав дахь хэлэлцүүлгийг хийж, гишүүдийн гаргасан зарчмын зөрүүтэй саналын томъёоллуудаар санал хураалт явуулж байна.
Өргөдлийн байнгын хорооны хуралдааны үеэр боловсрол, эрүүл мэнд, ГБХНХЯ-наас бусад төсвийн ерөнхийлөн захирагч нарын урсгал зардлаас 15 хувиар хасаж, тэтгэврийг 10 хувь +100 мянган төгрөгөөр нэмэхэд шаардагдах 567 тэрбум төгрөгийг гаргах зарчмын зөрүүтэй саналыг хэлэлцэж, гишүүдийн олонх нь дэмжсэн байна.
Энэ талаар УИХ-ын гишүүн С.Эрдэнэбат "Хөрөнгө оруулалтаа хасуулах сонирхолтой гишүүн алга. Нийт сонгогч нарт зам, байшин барих чухал байна уу. Цалин, мөнгө нэмэх нь чухал байна уу гэдгийг эрэмбэлэх хэрэгтэй. Ахмадын тэтгэврийн хувь дээр нэмэх нь 100 мянган төгрөг гэдэг агуулга ярьж байгаа. Ойролцоогоор 180 мянган төгрөг нэмэгдэх байх. Болдог бол дахиад төсвөө хасаад, ахмадын тэтгэврээ доод тал 1 сая төгрөг болгох хэрэгцээ байна. Харамсалтай нь, зарим гишүүн байшин барилгаа нэгдүгээрт эрэмбэлж байна" гэв.
