Салхитын мөнгөний ордын нөөцийг барьцаалж, ахмадуудын тэтгэврийг нэг удаа тэглэх зөвлөмжийг ҮАБЗ-өөс гаргасан. Үүний дагуу Засгийн газар хуулийн төсөл боловсруулж, энэ долоо хоногт УИХ-аар хэлэлцүүлэхээр бэлтгэж байна. Энэ талаар Сангийн сайд Ч.Хүрэлбаатараас тодруулахад “Монголбанкны ерөнхийлөгч Үндэсний аюулгүй байдлын зөвлөлд танилцуулга хийсэн юм билээ. ҮАБЗ-ийн шийдвэрийн дагуу Засгийн газар хуулийн төсөл боловсруулсан. Засгийн газрын хуралдаанд Монголбанкнаас хувь хүний авсан зээл, голдуу хувийн банкуудаас авсан зээлийг тодорхой шийдэл гаргаж шийднэ гэсэн танилцуулга хийсэн. Салхитын мөнгөний ордыг эргэлтэд оруулах замаар энэ асуудлыг шийдэх юм байна гэж ойлгож байгаа. Би бол Сангийн сайдын хувьд байр сууриа илэрхийлсэн. Улс төрийн шийдвэр нь гарчихлаа. Засгийн газар шийдвэрээ гаргачихлаа. Харин Засгийн газрын бонд гаргахгүй. Салхитын мөнгөний ордтой холбоотой компанийн л бонд гаргах байх. Энэ асуудлаар ОУВС-гийнхантай уулзаагүй. Удахгүй ОУВС-гийнхан ирнэ. Ер нь энэ шийдвэрийг ОУВC зөвшөөрнө гэж бодохгүй байна. ОУВС-гийн хөтөлбөр ирэх тавдугаар сард дуусах ёстой. Өнөөдрийг хүртэл Сангийн яам ОУВС-тай хийсэн гэрээгээ дуусгая, үр дүнд хүргэж ажиллая гэсэн зарчимтай ажиллаж ирсэн” гэв.
