Үндэсний их баяр наадмын өдрүүд буюу 2026 оны долоодугаар сарын 10-13-ны хооронд Гэмтэл согог судлалын үндэсний төв (ГССҮТ) болон салбар эмнэлгүүдийн Яаралтай тусламжийн тасгаар нийт 2006 хүн тусламж үйлчилгээ авчээ. Үүнээс 1251 нь насанд хүрэгчид, 755 нь 18 хүртэлх насны хүүхэд байна.
Энэ хугацаанд төв болон салбар эмнэлгүүдэд 84 хүнд яаралтай, 67 хүнд төлөвлөгөөт мэс засал хийжээ.
Мөн баяр наадмын өдрүүдэд зам тээврийн ослын улмаас 370 хүн яаралтай тусламж авсан байна. Үүний 230 нь насанд хүрэгчид, 140 нь 18 хүртэлх насны хүүхэд байжээ.
Харин мориноос унаж гэмтсэн 74 тохиолдол бүртгэгдсэнээс 13 нь ес хүртэлх насны хүүхэд, 21 нь 10-18 насны хүүхэд байсан байна. Түүнчлэн уралдааны мориноос унаж гэмтсэн таван хүүхэд эмнэлгийн тусламж үйлчилгээ авсныг ГССҮТ мэдээллээ.
