УИХ-ын гишүүн Л.Оюун-Эрдэнэ цаг үеийн асуудлаар сэтгүүлчдэд мэдээлэл өглөө.
Тэрээр "УИХ-ын даргын томилгоо дээр зарчмын байр сууриа барих нь зүйтэй гэж бодож байна. 126 гишүүнтэй, таван намтай парламент бий болсон. Түүнээс хойш хоёр намын дарга огцорчихлоо. Огцорсон шалтгаан аль аль нь нэг намыг төлөөлөөд УИХ-ын хуралдааныг улс төрийн зорилгоор удирдаад байна гэдэг асуудлаар огцорсон. Одоо бид олон намын тогтолцоо руу шилжиж байгаа. Сонгодог парламентийнхаа засаглал руу явах нь зүйтэй. Гурав дахь спикер гацаж байгаа шалтгааныг та бүхэн мэдэж байгаа. УИХ-ын даргын албан тушаалд очсон хүн 2027 оны Ерөнхийлөгчийн сонгуульд нэр дэвших магадлалтай гэдэг өнцгөөс өрсөлдөөд гацчихаад байна. Ингэх юм бол дахиад гурав дахь УИХ-ын дарга огцорно. УИХ-ын даргын индэр дээрээс Ерөнхийлөгчийн сонгуулийн бэлтгэл ажил хийнэ гэдэг таван намд ямар санагдах вэ. Тэгэхээр парламентийг эвгүй байдалд оруулахгүйн тулд УИХ-ын дарга гэдэг албан тушаал нам бус болох хэрэгтэй. УИХ-ын дарга хуралдаан зохион байгуулдаг хүн байхад манайх л дарга болгоод байдаг.
УИХ-ын даргад нэр дэвшиж байгаа хүмүүс шуналаа хойш нь татаад том агуулгаа хараад хамтдаа сонгодог парламентийн засаглалаа бэхжүүлэхийн төлөө алхах хэрэгтэй. Тэр хүн нам бус, Ерөнхийлөгчийн сонгуульд нэр дэвшихгүй, аль нэг намд үйлчлэхгүй, аль нэг намаас чиглэл авдаггүй хүн байг. Ингэж байж таван нам итгэнэ.
Танхимаа хэрхэн бүрдүүлэх нь Ерөнхий сайдын бүрэн эрхийн асуудал. Ерөнхий сайд бүтэц, томилгоогоо хэрхэн хийхээс хамаарч тэр Засгийн газар хэрхэн удаан засаглах вэ гэдэг нь шалтгаална. Миний хувьд Ерөнхий сайдаар ажиллахдаа олон сорилтыг даван туулсан. Н.Учрал намын дарга, Ерөнхий сайд яаж урт хугацаанд засаглах уу гэдэг нь хэнтэй ч үл хуваалцах өөрийнх нь бүрэн эрх. Үүн дээр өөрийнхөөрөө байж чадвал Н.Учрал олон зүйлийг шийдсэн түүхэн Ерөнхий сайд байна. Өөрийнхөөрөө байж чадахгүй бол утсан хүүхэлдэй болоод нийгмийн дэмжлэгээ алдана. Бас Монгол Улсын цагийг алж, өөрийн түүхээ сүйдлэнэ" гэв.
