Египетийн шүүх телевизийн хөтлөгч Сара Халифа болон өөр 11 хүнд хар тамхитай холбоотой хэрэгт буруутган цаазаар авах ял оноолоо.
Каирын Эрүүгийн хэргийн шүүх шүүгдэгчдийг хар тамхи үйлдвэрлэхэд ашигладаг түүхий эд, материалыг олж авч, улмаар худалдаалах зорилготой зохион байгуулалттай гэмт бүлэглэл байгуулсан гэм буруутайд тооцсон гэж төртэй холбоотой Al-Ahram хэвлэл мэдээлжээ.
Шүүх мөн есөн хамтран шүүгдэгчид бүх насаар нь хорих ял оноож, долоон хүнийг цагаатгасан байна. Уг хэрэгт нийт 28 хүн холбогдож, 750 гаруй кг хар тамхи, мансууруулах бодис хураан авсан аж.
39 настай Халифа нь хувийн Al-Mehwar TV сувгаар гардаг аюулгүй байдал, гэмт хэргийн сэдэвт “Mission Impossible” нэвтрүүлгийг хөтөлдгөөрөө хамгийн их танигдсан.
Тэрээр телевизийн ажлаас гадна гоо сайхны мэс заслын эмнэлэг болон арга хэмжээ зохион байгуулах компани ажиллуулдаг бизнес эрхлэгч төдийгүй Инстаграмд хоёр сая гаруй дагагчтай, олон нийтийн сүлжээнд идэвхтэй нэгэн байжээ.
Халифа өөрт нь тулгасан хэргийг үгүйсгэж, мөрдөн байцаагчдад “Би амьдралдаа тамхи ч татаж үзээгүй” хэмээн мэдэгдэж, өөрийгөө гэм буруугүй гэжээ.
Египетийн хэвлэлүүдийн мэдээлснээр, тэрээр шүүх хурлын үеэр уйлан, өршөөл хүсэж “Намайг сонсооч. Аав, ээж минь намайг зөв хүмүүжүүлсэн. Тэд мөргөл үйлддэг хүмүүс. Надад хар тамхины мөнгө хэрэггүй” хэмээн хэлжээ.
Прокурорын байгууллагын мэдээлснээр, уг бүлэглэл гадаадаас түүхий эд импортлон синтетик төрлийн хар тамхи үйлдвэрлэж, тэдгээрийг орон сууцны зориулалттай байруудад хадгалдаг байсан байна. Бүлэглэлийн гишүүд түүхий эд нийлүүлэх, үйлдвэрлэх, түгээх чиглэлээр үүргээ хуваарилж ажиллаж байсан гэж эрх баригчид мэдэгджээ.
Мөрдөн шалгах ажиллагааны үеэр хар тамхинаас гадна зөвшөөрөлгүй галт зэвсэг болон сум хэрэгсэл хураан авсан байна.
Прокурорын байгууллага уг бүлэглэл нэгэн орон сууцны байрыг түүхий эд хадгалах болон хар тамхи үйлдвэрлэх зориулалтаар ашиглаж байсан гэж мэдэгджээ.
Цаазаар авах ялтай холбоотой хэрэгт Египетийн хуулийн дагуу шүүхээс тус улсын Их муфтигаас шашны асуудлаарх заавал бус зөвлөмжийн санал авсны дараа уг шийдвэрийг гаргасан байна. Шүүхийн шийдвэрийг Египетийн Кассацийн шүүхэд давж заалдах боломжтой.
Сүүлийн үеийн шүүхийн шинэчлэлийн дагуу шүүгдэгчид хоёр шатны давж заалдах боломжтой бөгөөд эхний ээлжид давж заалдах шатны шүүхэд дахин хэлэлцүүлэх хүсэлт гаргаж болно.
Сара Халифа 2025 оны дөрөвдүгээр сард энэхүү хэргийн мөрдөн шалгах ажиллагааны хүрээнд баривчлагдсан юм. Мөн бямба гарагт тус шүүх өөр нэг тусдаа хэрэгт Халифад жолоочоо зодож, бичлэг хийсэн хэрэгт гурван жилийн хорих ял оноожээ.
Египет улс хар тамхины наймаа, терроризм болон санаатайгаар хүний амь хөнөөсөн хэрэгт цаазаар авах ял оногдуулах хуультай.
