2016 онд ОХУ-ын иргэн болж байсан Холливүүдийн тулаант киноны од Стивен Сигалыг АНУ дахь Москвагийн хүмүүнлэгийн элчээр томилогдсон тухай ОХУ-ын Гадаад хэргийн яам фейсбүүк хуудсаар дамжуулан мэдээллээ.
Түүний үүрэг нь “Хүмүүнлэгийн салбар дахь Орос-Америкийн харилцааг хөгжүүлэх”, үүнд “Урлаг, соёл, иргэдийн болон залуу үеийнхний солилцоо” багтана гэдгийг ОХУ-ын гадаад хэргийн яамны фэйсбүүк хуудсанд мэдээлсэн байна.
Нийтдээ 60 гаруй кинонд дүр бүтээсэн 66 настай Сигал “Би Орос-Америкийн харилцааг сайжруулахын тулд чадах бүхнээ хийсээр ирсэн. Энэ ажлыг би ямар нэг албан ёсны статусгүйгээр гүйцэтгэж ирсэн бол одоо албан ёсоор хийх болсон нь миний хувьд нэр төрийн хэрэг юм” хэмээн ярьжээ.
Өөрийн удам судрыг Оросоос гаралтай гэж ярьдаг Сигал одоо АНУ, ОХУ-ын давхар иргэншилтэй. Крымьд болсон концертод оролцсон түүнийг Украин улс өнгөрсөн тавдугаар сард 5 жилийн хугацаанд нутаг дэвсгэртээ нэвтрэхийг хориглож байв. Тухайн үед Сигал “хар бүснээс гадна би хар жагсаалттай болов” хэмээн хошигнож байжээ.
Энэ асуудлаар АНУ-ын Төрийн департамент ямар нэгэн тайлбар хийхээс татгалзжээ.
Өмнө нь тэрбээр ОХУ-ын Ерөнхийлөгч Владимир Путинтай ганцаарлан уулзах хүсэлтэй байгаа тухай ярьж байсан. Мөн тэр ОХУ-ын хууль сахиулах албанд орох хүсэлтэй байгаагаа илэрхийлж байсан ажээ.
