Хятад, Монгол хоёр улс нэг нэг жилээр ээлжлэн Улаанбаатар-Бээжин, Бээжин-Улаанбаатар чиглэлд галт тэргээр зорчигч тээвэрлэдэг. Өчигдөр Улаанбаатар-Бээжин чиглэлийн галт тэрэг энэ жилийн анхны аялалдаа гарлаа.

Галт тэргийг 10 жил тутамд бүрэн засварт оруулдаг. Энэ дагуу Улаанбаатар-Бээжин чиглэлийн 24-р галт тэргийг засварлаж, анхны тээвэртээ гарч байгаа нь энэ юм. Олон улсын стандартад нийцүүлэн, зорчигчдын аюулгүй, тав тухтай зорчих боломжийг хангажээ. 24-р галт тэрэг тээшийн, рестораны, люкс, тасалгаат зэрэг 12 вагоноос бүрдэнэ.

УБТЗ-ын зорчигч тээврийн албаны дарга Д.Нарантуяа  “Улаанбаатар-Бээжингийн чиглэлд олон улсын протоколоороо жил жилд ээлжилж явдаг. Энэ жил манай галт тэрэг явж байна. Бид энэ аялалд бэлдэж Бээжийн явах галт тэргүүдээ ээлжилж засварт оруулан энэ жилийн анхны аялалд нь гаргалаа. Зуны аялал жуулчлалын улиралд зориулан БНХАУ-аас нэмэлт галт тэрэг гарч байгаа. Тиймээс Улаанбаатар-Бээжин чиглэлд энэ зуны турш жуулчид болон амрагч, оюутнуудад үйлчлэх галт тэрэг хангалттай байгаа” гэв.

Улаанбаатар-Бээжин чиглэлийн галт тэрэг долоо хоног бүрийн Пүрэв гаригт хуваарийн дагуу хөдөлнө. Нэг удаагийн явалтаараа 378 зорчигчийг Бээжинд хүргэх хүчин чадалтай юм байна. Зорчигчдод 30 орчим ажилтан үйлчилнэ. Вагон бүрт эко ариун цэврийн өрөө, зурагт, агааржуулагч зэргийг байршуулжээ.

Пүрэв гаригийн 07 цаг 30 минутад хөдөлсөн галт тэрэг Баасан гаригийн 14 цаг 35 минутад Бээжинд очно. Харин Бээжингээс Бямба гаригийн 07 цаг 27 минутад хөдөлж, дараа өдрийн 14 цаг 35 минутад Улаанбаатарт ирэх юм. Түүнээс гадна жил бүрийн зургаадугаар сараас аравдугаар сар хүртэл нэмэлт галт тэрэг зорчигчдод үйлчилж эхлэх юм байна.

Улаанбаатар-Бээжин чиглэлийн галт тэрэгний тасалбарын үнэ 296450-447350 төгрөг байна.