Өнгөрсөн хоногт Хэнтий, Сүхбаатар, Дорнод аймгуудад таван удаагийн ой, хээрийн түймэр бүртгэгджээ.
Сүхбаатар аймгийн Эрдэнэцагаан сумын нутагт хоёр удаагийн хээрийн түймэр бүртгэгдсэн талаар бид өмнө нь мэдээлсэн.
Эдгээрээс гадна Хэнтий аймгийн Баян-Адарга сумын “Адаргын овооны-Ар” гэдэг газар ойн гал түймэр гарчээ. Энэ тухай дуудлагыг тавдугаар сарын 13-ны өдрийн 10:35 цагт хүлээн авсан байна. Тус аймгийн Онцгой байдлын газрын Баян-Адарга сум дахь Эрэн хайх, аврах салбар, Баян-Адарга сумын Мэргэжлийн анги, Батноров сум дахь 42 дугаар ангийн алба хаагчид, орон нутгийн иргэд ойн гал түймрийг унтраах ажиллагааг зохион байгуулжээ. Улмаар мөн өдрийн 16:00 цагт цурамд оруулж, бүрэн унтраахаар ажиллаж байна. Урьдчилсан байдлаар түймэрт 20 га орчим талбай өртжээ.
Мөн Дорнод аймгийн Баянтүмэн сумын Хотонт багийн "Шар бүрд" гэдэг газар хээрийн гал түймэр гарчээ. Энэ тухай дуудлагыг тавдугаар сарын 13-ны өдрийн 16:45 цагт хүлээн авсан байна. Дуудлагын дагуу аймгийн Онцгой байдлын газрын Эрэн хайх, аврах ангийн алба хаагчид, Баянтүмэн сумын Мэргэжлийн ангийнхан хээрийн гал түймрийг унтраах ажиллагааг зохион байгуулан 19:50 цагт бүрэн унтраажээ. Улмаар тус сумын Засаг даргын орлогчид хүлээлгэн өгсөн байна. Урьдчилсан байдлаар түймэрт 400 га орчим талбай өртсөн.
Түүнчлэн Дорнод аймгийн Сэргэлэн сумын Ар хоолой багийн "Их дэлгэр" гэдэг газар хээрийн гал түймэр гарсан тухай дуудлагыг тавдугаар сарын 13-ны өдрийн 17:10 цагт хүлээн авсан байна. Сэргэлэн сумын Мэргэжлийн ангийн алба хаагчид, орон нутгийн иргэд хээрийн гал түймрийг унтраах ажиллагааг зохион байгуулан 19:30 цагт бүрэн унтраажээ. Урьдчилсан байдлаар түймэрт 200 га орчим талбай өртсөн гэдгийг ОБЕГ мэдээллээ.
