БНХАУ шатахууны үнийн төлөвлөсөн огцом өсөлтийг бууруулж, жолооч нарт ирэх ачааллыг хөнгөрүүлэх арга хэмжээ авчээ. Энэ нь Ираны дайнаас үүдэлтэй эрчим хүчний үнэ огцом өссөнтэй холбоотой юм.
Тус зөрчил эхэлснээс хойш бензиний дотоод үнэ ойролцоогоор 20 хувиар өссөн байна. Учир нь Иран дэлхийн хамгийн ачаалалтай нефть тээврийн замуудын нэг болох Ормузын хоолойг хаахад хүргэсэн.
Анх дотоодын бензин, дизелийн үнийг нэг тонн тутамд 2205 юань болон 2120 юаниар нэмэхээр төлөвлөж байсан ч Засгийн газрын зохицуулалтаар өсөлтийг бараг тал хүртэл нь бууруулж, 1160 болон 1115 юань болгон мягмар гарагаас хэрэгжүүлэхээр болсон байна.
Хятадад 300 сая гаруй жолооч шатахуун хэрэглэдэг автомашинаас хамааралтай бөгөөд Персийн булангийн орнууд нефтийн гол нийлүүлэгч хэвээр байна. Өнгөрсөн амралтын өдрүүдэд олон хотод шатахуун түгээх станцуудын гадна урт дараалал үүсэж, зарим нь шатахуун дууссанаа зарлахад хүрчээ.
Сүүлийн нэмэгдэл нь энэ онд хийгдсэн тав дахь бөгөөд хамгийн өндөр өсөлт болсон байна.
Мягмар гарагт Brent газрын тосны үнэ баррель нь 100 ам.доллароос давсан нь АНУ-Ираны хэлэлцээний талаарх зөрүүтэй мэдээллээс шалтгаалсан савлагаатай холбоотой.
Saxo Bank-ны түүхий эдийн стратегийн хэлтсийн дарга Оле Хансены хэлснээр, Хятад улс өмнө нь хямд нефтийн үеийг ашиглан дэлхийн хамгийн том нөөцүүдийн нэгийг бүрдүүлжээ. Тус улс 900 сая баррель орчим нефтийн нөөцтэй бөгөөд энэ нь бараг 3 сарын импортын хэрэгцээтэй тэнцэнэ.
Мөн Колумбийн их сургуулийн тооцоогоор Хятад улс 1.4 тэрбум баррель бензиний нөөцтэй гэнэ. Хэдийгээр ийм хэмжээний нөөцтэй ч богино хугацаанд нийлүүлэлтээ хянах зорилгоор Хятадын эрх баригчид нефть боловсруулах үйлдвэрүүдэд шатахууны экспортыг түр зогсоох чиглэл өгсөн гэх мэдээлэл байна.
Шатахууны үнийг 10 хоног тутамд дэлхийн нефтийн үнээс хамаарч шинэчилдэг Хятадын Үндэсний хөгжил, шинэчлэлийн хороо энэ удаагийн зохицуулалтыг хэрэгжүүлжээ.
Азийн орнууд шатахууны үнийн өсөлтийг сааруулах арга хэмжээ авч байна
Азийн бусад улс орнууд ч мөн адил зардлыг бууруулах янз бүрийн бодлого хэрэгжүүлж эхэлжээ. Тухайлбал,
Филиппин: Төрийн албан хаагчдыг 4 өдөр ажиллах горимд шилжүүлсэн
Шри Ланка: Лхагва гарагийг амралтын өдөр болгосон
Тайланд, Вьетнам: Иргэдийг гэрээсээ ажиллахыг уриалсан.
Түүнчлэн Тайландын төрийн албан хаагчдад гадаад томилолтыг зогсоох, богино ханцуйтай хувцас өмсөх, цахилгаан шатны оронд шат ашиглах зэрэг заавар өгчээ.
Шатахууны үнийн өсөлтөөс үүдэн Шри Ланкад хувийн автобусны үйлчилгээ бараг зогсож, харин Филиппинд 3-р сарын 26–27-нд тээврийн ажилчид ажил хаялт зарласан байна.
Япон болон БНСУ нь Ормузын хоолойгоор дамждаг нефть, хийнээс ихээхэн хамааралтай тул хамгийн их өртсөн орнуудын тоонд багтаж байна. Японд бензиний үнэ литр тутамд 191 иенд хүрч түүхэн дээд түвшинд хүрчээ.
